სამცხე–ჯავახეთის სამ ოლქში ენმ–ს წევრებმა შემაჯამებელ ოქმებს ხელი არ მოაწერეს

N37 ახალციხის საოლქო საარჩევნო კომისიამ საპრეზიდენტო არჩევნების მეორე ტურის შედეგების შემაჯამებელი ოქმი დღეს, შვიდ დეკემბერს 12:00 საათზე გამოაქვეყნა, რომლის მიხედვითაც მუნიციპალიტეტში 9 193 ხმა გაერთიანებული ოპოზიციის კანდიდატმა გრიგოლ ვაშაძემ, ხოლო 11 662 ხმა მმართველი გუნდის მიერ მხარდაჭერილმა დამოუკიდებელმა კანდიდატმა სალომე ზურაბიშვილმა მიიღო.

დღეს, შემაჯამებელი ოქმს არ დაეთანხმა ახალციხის საოლქო კომისიაში „ნაციონალური მოწრაობის“ წარმომადგენელი მანუჩარ ფანგანი: „ხელი არ მოვაწერე, თუმცა ოქმში ჩემი პრეტენზია დავაფიქსირე გაზრდილ სპეცსიებსა და გადასატან ყითებთან დაკავშირებით, ასევე იყო მოსყიდვა და ზეწოლა“.

იგივე მიზეზით თქვა უარი შემაჯამებელ ოქმზე ხელის მოწერაზე ენმ–ეს წარმომადგენელმა N38 ადიგენის საოლქო საარჩევნო კომისიაში ვასილ გიქოშვილმა: „ყველამ ძალიან კარგად იცის როგორ მიდიოდა საარჩვენო პროცესები, რამდენი ზეწოლა ხდებოდა ამომრჩეველზე. არ ვიცი როგორ შეიძლება ჩაითვალოს ეს არჩევნები სამართლიანად, ეს ჩემი პირადი გადაწყვეტილება იყო და ხელი არ მოვაწერე“.

შემაჯამებელი ოქმის მიხედვითა ადიგენში, სალომე ზურაბიშვილმა 6 002 ხმა, ხოლო გრიგოლ ვაშაძემ 4 238 ხმა მიიღო.

საპრეზიდენტო არჩევნების მეორე ტურის შედეგები შეაჯამა N40–ე ახალქალაქის საოლქო საარჩევნო კომისიამაც. როგორ საოლქო კომისიის თავმჯდომარის მოადგილემ პაატა ფანჯაკიძემ განაცხადა, ოქმზე ხელი არ მოაწერია „ნაციონალური მოძრაობის“ წარმომადგენელმა თეონა ჭალიძემ.
ჭალიძე კი „სამხრეთის კარიბჭესთან“ აცხადებს, იგი სხდომას, რომელაზეც შემაჯამებელი ოქმი შედგა არ დასწრებია: „სპეციალურად არ შემატყობინეს სხდიომის შესახებ და ჩემი პოზიციაც არ დაფიქსირებულა. იქ რომ ვყოფილიყავი რაღაცას მაინც ვიტყოდი“.
ახალქლაქში სალომე ზურაბიშვილმა 12 446 ხმა, ხოლო გრიგოლ ვაშაძემ 7 106 ხმა მიიღო.

შემაჯამებელი ოქმები უკვე დაიწერა ბორჯომში, ასპინძასა და ნინოწმინდაში. სამივე ოლქში შემაჯამებელ ოქმებს ხელი კომისიის ყველა წევრმა მოაწერა.

შემაჯამებელი ოქმების მიხედვით, ბორჯომში სალომე ზურაბიშვილმა – 10 403, გრიგოლ ვაშაძემ – 4 560, ასპინძაში სალომე ზურაბიშვილმა – 4 248, გრიგოლ ვაშაძემ – 2 292 ხმა მიიღო, ნინოწმინდაში კი სალომე ზურაბიშვილმა – 7 572 ხმა და გრიგოლ ვაშაძემ – 4 247 ხმა მიიღო.

საქართველოში საპრეზიდენტო არჩევნების მეორე ტური 28 ნოემბერს ჩატარდა, რომლის შედეგების მიხედვითაც მმართველი გუნდის მხარდამჭერილი დამოუკიდებელი კანდიდატი სალომე ზურაბიშვილი საქართველოს მეხუთე პრეზიდენტი გახდა. ზურაბიშვილის ინაუგურაცია 16 დეკემბერს თელავში გაიმართება.

[ლუბა გიორგაძე, ახალციხე]