ბოლო 16 საათია ფოკაში იწვის 33 წლის კაცის მკვლელობაში ბრალდებულის 2 სახლი და 4 მანქანა [Photo/Video]

ფოკაში მკვლელობაში ბრალდებულის და მისი ბაბუის სახლები, ასევე, მანქანები და სათავსო გადაწვეს. სახლებში ცეცხლი ჩამქრალი ჯერ კიდევ არაა. ორივე სახლთან პოლიცა დგას.

ბრალდებული ერთ–ერთ სახლში მშობლებთან, ცოლთან და ორ მცირეწლოვან შვილთან ერთად ცხოვრობდა. ბაბუის სახლი კი დაკეტილი იყო.

სოფელში მომხდარზე საუბარი არ სურთ. გადამწვარ სახლებსა და მანქანებზე მხოლოდ იმას ამბობენ, რომ „ეს სოფლის კანონია და ამის შესახებ გადაწყვეტილება ფოკელებმა ერთად მიიღეს“.

ბრალდებულის სახლები და მანქანები გუშინ, სამ დეკემბერს, ღამით გადაწვეს. პოლიციამ მისი ოჯახის უსაფრთხო ადგილზე გაყვანა მანამდე მოასწრო. შემთხვევის შედეგად არავინ დაშავებულა.























ფოკაში, სოფლის ცენტრში, სამ დეკემბერს 33 წლის კაცი, როგორც ადგილობრივები ამბობენ, თანაკლასელმა მოკლა. გარდაცვლილს სამი ტყვია მუცელში, ერთი კი თავში აქვს მორტყმული. შინაგან საქმეთა სამინისტროში ამბობენ, რომ მკვლელობის მოტივი წარსულში პირადი კონფლიქტი იყო. პოლიციამ განზრახ მკვლეობაში ბრალდებული ამავე დღეს, მომხდარიდან ერთ საათში დააკავა. უწყების ინფორმაციით დაკავებული ბრალს აღიარებს. პოლიცია ამ ფაქტს მკვლელობის მუხლით იძიებს.

[მარიამ ბარძიმაძე, ნინოწმინდა]