ვანო მერაბიშვილის ბიძის საქმეზე დღეს მოწმეები დაკითხეს

პროცესზე ბრალდების მხარის მტკიცებულებების გამოკვლევა მიმდინარეობდა, რისთვისაც 4 მოწმე დაიკითხა. მათ შორის უტყისუბნის ყოფილი რეინჯერი, რომელიც ამჟამად ადიგენის რაიონის სოფელი უდის რწმუნებულია.

ამბროსი აფრიამაშვილმა დაკითხვაზე აღიარა, რომ ის ლევან თუმანიშვილის დავალებით ტყის სარგებლობის ბილეთს უკანონოდ გასცემდა.
აფრიამაშვილი ჩადენილს იმით ხსნის, რომ ლევან თუმანიშვილის გავლენის გამო შესაძლებელია სამსახურის გარეშე დარჩენილიყო.
აფრიამაშვილმა მოსამართლეს 28-კაციანი სია წარუდგინა, ვისზეც უკანონოდ ჰქონდა გაცემული ხე მასალა. როგორც მან განაცხადა, 28 კაციდან 20 შპს „ტაოს“ თანამშრომელია.

ამბროსი აფრიამაშვილის გარდა დაიკითხა ის სამი მოწმეც, რომელთა სახელზეც ტყით სარგებლობის ბილეთი იყო გამოწერილი. პროკურორის მიერ წარმოდგენილ შესყიდვების აქტს ხელს აღნიშნული მოწმეები აწერენ, თუმცა მოწმეებმა დაკითხვისას განაცხადეს, რომ მათ აღნიშნული ბილეთით არ უსარგებლიათ და შესაბამისად, ხელმოწერაც მათი არ არის.

სასამართლო პროცესს ვანო მერაბიშვილის დედა, ლევან თუმანიშვილის და, ჟენია მერაბიშვილიც ესწრებოდა. ლევან თუმანიშვილის საქმეზე ეს მეორე სასამართლო პროცესი იყო. როდის გაიმართება მომდევნო პროცესი, დღეს თარიღი არ დასახელებულა.
შპს „ტაოს“ ხელმძღვანელი ლევან თუმანიშვილი 2012 წლის 14 დეკემბერს, ფინანსთა სამინისტროს საგამოძიებო სამსახურმა დააკავა. იგი გირაოს, 50 000 ლარის სანაცვლოდაა გათავისუფლებული. გამოძიება სისხლის სამართლის კოდექსის 303-ე და 210-ე მუხლებით მიმდინარეობს.

გამოძიების თანახმად, თუმანიშვილის ხელმძღვანელობით საწარმოს თანამშრომლები სამცხე-ჯავახეთის ტყის უბნებში უკანონოდ ჭრიდნენ ხე-ტყეს და მწვანე ნარგავებს, რის შედეგადაც, მოპოვებული ხე მასალა თუმანიშვილის კუთვნილ გადამამუშავებელ საამქროში მიჰქონდათ. ასევე, თუმანიშვილი მოპოვებული სამასლე მერქნის რეალიზაციის დროს, ყალბი საგადასახადო დოკუმენტების დამზადების გზით, სისტემატურად ზრდიდა მიღებული შემოსავლების ხარჯებს, რითაც თავს არიდებდა სახელმწიფო ბიუჯეტში გადასახადების გადახდას.

[მანანა სარაშვილი, ახალციხე]