ფარავნის მცხოვრებლები მიწების დაბრუნებას ითხოვენ

ნინოწმინდის მუნიციპალიტეტის სოფელ ფარავნის 40-მდე მცხოვრები დღეს ფარავნიდან ახალციხეში, მხარის გუბერნატორთან შესახვედრად ჩამოვიდა. ადგილობრივები მხარის რწმუნებულისგან დახმარებას ელიან. ისინი ამბობენ, რომ სამი დღის წინ შეიტყვეს, რომ მიწა, რომელსაც სათბად და საძოვრებად იყენებენ, 2001-2002 წლებში იჯარით გაუციათ.

„მოვიდნენ და გვითხრეს, რომ ეს მიწები ჩვენ არ გვეკუთვნის, 2001-2002 წლებში გაუციათ იჯარით. ჩვენი მიწები ჩვენ უნდა დაგვრჩეს! ჩვენი მოთხოვნაა ან მოგვყიდონ, ან იჯარით მოგვცენ“, - ამბობს ფარავნის ერთ-ერთი მცხოვრები ანთრანიკ ეზოიანი.
ფარავნის მცხოვრებლებს მხარის რწმუნებული სამსახურში არ დახვდა.

„დაგვირეკა და გვითხრა, რომ ახალქალაქშია. წავალთ და დაველაპარაკებით. უნდა, გავარკვიოთ ვის ეკუთვნის ეს მიწები და დაგვიბრუნებენ თუ არა“, - აცხადებს ნაირი მკრტჩიანი.

ახალციხეში ჩამოსულმა ფარავნის მცხოვრებლებმა დღესვე საჯარო რეესტრში იმის გარკვევაც სცადეს, ვინ რა ფართობს ფლობს სადაო ტერიტორიაზე. თუმცა, შეხვედრა არც საჯარო რეესტრში შედგა.

ამ წუთებში ფარავნის მცხოვრებლები ახალქალაქში მიემგზავრებიან. შეთანხმების თანახმად, სამცხე-ჯავახეთის გუბერნატორთან ივანე წიკლაურთან შეხვედრა ახალქალაქში უნდა შედგეს.

[თამარ თოთაძე, ახალციხე]