ინსტიტუციური დიალოგის პირველ ფორუმს მთავრობა ახალციხეში გამართავს

ფორუმი „ახალციხის ციხეზე“ ხუთ და ექვს მაისს გაიმართება. მას პრემიერ მინისტრი გიორგი კვირიკაშვილი, რეგიონული განვითარებისა და ინფრასტრუქტურის მინისტრი მაია ცქიტიშვილი, რეგიონული პოლიტიკისა და თვითმმართველობის კომიტეტის თავმჯდომარე ზაზა გაბუნია, პარლამენტის თავმჯდომარე ირაკლი კობახიძე, თბილისის მერი კახა კალაძე, ასევე პარლამენტის, სამხარეო ადმინისტრაციისა და ადგილობრივი თვითმმართველობების წარმომადგენლები დაესწრებიან.

სახელმწიფო და ადგილობრივ ხელისუფლებას შორის ინსტიტუციური დიალოგის ყოველწლიური ფორუმის შექმნის იდეა ზაზა გაბუნიას ეკუთვნის. მისი მიზანი წელს მმართველობის დეცენტრალიზებულ მოდელზე გადასვლის საკითხების განხილვა იქნება.

„გვინდა რომ მმართველობის დეცენტრალიზებულ მოდელზე გადავიდეთ და ადგილობრივ თვითმმართველობებს მეტი უფლებები მივანიჭოთ. ასევე, ჩვენი მიზანია, რომ თვითმმართველობების მუშაობაში მოქალაქეების ჩართულობა გავზარდოთ. ფორუმზე მსჯელობა სწორედ ამ საკითხებზე იქნება“, – განუცხადეს „სამხრეთის კარიბჭეს“ რეგიონული პოლიტიკისა და თვითმმართველობის კომიტეტში.

ხუთ მაისს ფორუმს 14:00 საათზე ზაზა გაბუნია, გიორგი კვირიკაშვილი, მაია ცქიტიშვილი და კახა კალაძე გახსნიან. ამ დღეს განხილული ორი საკითხი იქნება: „რეგიონული უთანაბრობა, როგორც გამოწვევა და დეცენტრალიზაციის რეფორმა“, „ინტერმუნიციპალური კავშირების ფორმირება და გაძლიერება“.

ექვს მაისს, 11:00 საათიდან მერების კონგრესი დაიწყება. თემაზე „ადგილობრივი გამოწვევები და მიღწევები“ ახალციხის, ზუგდიდის, გორის, ბათუმისა და მარნეულის მერები ისაუბრებენ. შემდეგი განსახილველი საკითხი, „ინსტიტუციური დიალოგი, როგორც ფორმატი, და მისი მნიშვნელობა“ იქნება. ფორუმს სამცხე–ჯავახეთის გუბერნატორი კახა სამხარაძე და ზაზა გაბუნია შეაჯამებენ.

[მარიამ ბარძიმაძე ახალციხე]