მართვის მოწმობის გასაახლებლად ოთხი დღე დარჩა

ოთხ დღეში, პირველ აპრილს, 2006 წლის 1 აპრილამდე გაცემულ მართვის მოწმობებს იურიდიული ძალა დაეკარგება. მან, ვინც ამ დრომდე მართვის მოწმობის განახლება ვერ მოასწრო, შინაგან საქმეთა სამინისტროს მომსახურების სააგენტოს დარჩენილ ვადაში უნდა მიაკითხოს. ძველი მართვის მოწმობით სიარული 500–ლარიან ჯარიმას ითვალისწინებს.

მართვის ძველი მოწმობის შესაცვლელად, ჯანმრთელობის მდგომარეობის შესახებ ცნობის, პირადობის დამადასტურებელი მოწმობისა და არსებული მართვის მოწმობის წარდგენაა საჭირო. მოწმობის განახლება 15 ლარი, დაკარგულის აღდგენა კი 35 ლარია.

საქართველოს შინაგან საქმეთა სამინისტროს ცნობით, ამ დრომდე, სამცხე–ჯავახეთის მასშტაბით, მართვის მოწმობა 4 337–მა მოქალაქემ შეცვალა.

იმ შემთხვევაში თუ მოქალაქემ 1 აპრილამდე ვერ შეცვალა მართვის მოწმობა, ავტომობილის მართვა შეეძლება მხოლოდ მას შემდეგ, რაც მართვის მოწმობას განაახლებს. მოწმობის შეცვლისთვის გამოცდის ჩაბარება არც ახლაა საჭირო და არც ვადის გასვლის შემდეგ.

[თინათინ ზაზაძე, ახალციხე]