„13 LEGION”-მა საერთაშორისო ტურნირზე წარმატებით იასპარეზა

10–11 ნოემბერს თბილისში, დეკადის დარბაზში შერეული ორთაბრძოლების საერთაშორისო ტურნირი ჩატარადა. მასში მონაწილეობას სპორტსმენები საქართველოსთან ერთად აზერბაიჯანიდან, ირანიდან, სომხეთიდან, თურქეთითან და რუსეთიდან იღებდნენ.

ტურნირში „13 LEGION“–იდან ოთხი სპორტსმენი მონაწილეობდა. გუნდმა სამი პირველი და ერთი მეორე ადგილი მოიპოვა. მათ სხვადასხვა ასაკობრივ კატეგორიებში გაიმარჯვეს.

შეხვედრა სამი რაუნდისაგან შედგებოდა. თითოეულ ასაკობრივ კატეგორიას ბრძოლისას სხვადასხვა დრო ეთმობოდა.

ჰამლეტ მარკოსიანმა 15–16 წლის , საბა დარბაიძემ 17 წლის, მერუშ პალიანმა 14 წლის ასაკობრივ კატეგორიებში პირველი ადგილი დაიკავეს. ხოლო კლუბის უმცროსი წევრი გეო გრიგორიანი 11–12 წლის ასაკობრივ კატეგორიში მეორე ადგილზე გავიდა. მათ ადგილის შესაბამისი მედლები და სერტიფიკატები გადაეცათ.

„საბამ და ჰამლეტმა თავისი ბრძოლები ნოკაუტით მოიგეს, დაახლოებით, 20 წამი დასჭირდათ, ხოლო მერუშმა ქულებით თავისზე დიდ მოწინააღმდეგესთან მოიგო . გეომ კი ფინალური შეხვედრა მხოლოდ 2 ქულით დათმო“,– ამბობს სამცხე ჯავახეთის უნივერსალური ორთაბრძოლების კლუბის „13 LEGION“–ის პრეზიდენტი მიშა მესხი.

მისი თქმით, მსგავსი ტიპის ტურნირები ხშირად ტარდება, თუმცა უსახსრობის გამო ყველგან მონაწილეობის მიღებას ვერ ახერხებენ: „ ევროპის ჩემპიონატი ტარდება შერეულ ორთაბრძოლაში, მაგრამ ევროპის და მსოფლიო ჩემპიონატზე გვიჭირს მონაწილეობის მიღება, ეს სახსრებთანაა დაკავშირებული“.

[მარიამ ბარძიმაძე, ახალციხე]