ირიგაციის პრობლემა – ადიგენის მერობის კანდიდატების გეგმები

N2 გელა სარაშვილი – საარჩევნო ბლოკი: „ბაქრაძე - უგულავა – ევროპული საქართველო“: „სარწყავი წყლის პრობლემების გადასაჭრელად ყველა პრობლემას ადგილზე შევისწავლით, სადაც საჭიროა საგუბარს გავაკეთებთ, სადაც საჭიროა არხებს მოვაწყობთ. ვეცდებით, რომ სარწყავი წყალი ყველა სოფლამდე თვითდინებით მივიყვანოთ. საჭიროების შემთხვევაში საქაჩებსაც გავაკეთებთ.

N3 ჯემალ ვანაძე – „დიმიტრი ლორთქიფანიძე, კახა კუკავა–დემოკრატიული მოძრაობა–თავისუფალი საქართველო“: „ადიგენში მიწების გასარწყავიანება ძალიან მარტივია, რადგან რამდენიმე ბუნებრივი ტბა გვაქვს და თვითდინებით შეიძლება ნაკვეთებამდე წყლის მიყვანა. ამიტომ ვფიქრობ, რომ სარწყავის პროლბემის მოგვარებას დიდი ენერგია არ სჭირდება.

N5 რატი ტატალაშვილი – „ერთიანი ნაციონალური მოძრაობა“: „სარწყავის პრობლემა მოგვარდება სწორი მენეჯმენტის და თანხების მიზანმიმართულად ხარჯვის შემთხვევაში. ადიგენის წყლის რესურსით მდიდარია და ამიტომ მთელი რაიონის გასარწყავიანებაა შესაძლებელი. ტყეში წყლის დაგუბებით შეგვიძლია უზარმაზარი რეზერვუარი გავაკეთოთ. ასე უდესა და არალს 100%–ით გავასარწყავიანებთ. ეს უზარმაზარი პროექტი იქნება“.

N8 მინდია ჯელია – „დავით თარხან მოურავი, ირმა ინაშვილი – საქართველოს პატრიოტთა ალიანსი“: „ვიცი სად არის დებეტი და წყლის რესურსი, ასევე ვიცი როგორ უნდა გაკეთდეს პატარა საგუბრები. ასევე შეიძლება გრანდიოზული საგუბარის გაკეთება ფერსათის მთაზე, რომელიც მდინარე ქვაბლიანის მარცხენა სანაპიროს ზედა სოფლების გასარწყავიანებას უზრუნველყოფს. ამას არანაირი დანახარჯი არ დასჭირდება. მხოლოდ თავიდან გაიწევა ხარჯი და შემდეგ იქნება სულ მოგებაზე“.

N41 ზაქარია ენდელაძე – „ქართული ოცნება – დემოკრატიული საქართველო“: „სარწყავი წყლის პრობლემის მოგვარება ჩვენი პრიორიტეტია. წინასაარჩევნო პერიოდში ჩვენ არსებული სისტემები მოვაწესრიგეთ, მაგალთად ბოლაჯურში სარწყავი სისტემა მთლიანად განვაახლეთ. არჩევნების შემდგომაც ჩვენი მიზანი იქნება, როგორც არსებული სარწყავი სისტმების განახლება, ასევე დამატებითი საქაჩების გაკეთება იქ, სადაც ამის საჭიროება და რესურსი იქნება.

[თამუნა უჩიძე, ადიგენი]