სამხარეო სამმართველო სპეცრაზმის მობილიზების შესახებ ინფორმაციას უარყოფს

გუშინ ღამით ინტერნეტ მედიით გავრცელდა ინფორმაცია, რომ შსს-ს სპეცდანიშნულების რაზმი, რომელიც რამდენიმე დღის წინ ახალქალაქში გამოჩნდა, დაახლოებით სამი საათის წინ ახალციხეში გადაისროლეს.

მუმლაძე აცხადებს, რომ რეგიონში მშვიდობაა და მდგომარეობას სრულად აკონტროლებენ: „რა სისულელეა?! ვინ თქვა ეს?! რა სპეცრაზმი?! თუ არ სჯერათ დაღემდება დღევანელი დღეც და ყველა ნახავს, რომ მშვიდობაა და რეგიონში მსგავსი არაფერი ხდება“.

ამბავს სპეცრაზმის შესახებ სააგენტო Newposts-ი ანონიმურ წყაროზე დაყრდნობით ავრცელებს და ამბობს, რომ „სპეცდანიშნულების რაზმი შსს-ს კუთვნილი სატრანსპორტო საშუალებებით გადაადგილდებოდა და ჩვეულებისამებრ, მათში მსხდომნი შავი ნიღბებით იყვნენ“.

ამავე სააგენტოს ინფრომაციით, „წყარო ვერ აკონკრეტებს, რა მიზნით მოხდა შსს-ს ძალების გადაყვანა ახალქალაქიდან ახალციხეში. ადგილობრივები ამის შესაძლო მიზეზად ორ ვერსიას ასახელებენ: ბოლო პერიოდში სომხური ენისთვის რეგიონალური სტატუსის მინიჭებასთან დაკავშირებით განვითარებულ მოვლენებს და დღეს განვითარებულ მოვლენებს რაბათის კომპლექსთან დაკავშირებით“.

ამ ინფორმაციას გუშინ ღამითვე დიდი გამოხმაურება მოჰყვა სხვადასხვა სოციალურ ქსელში: „რა ხდება ახალციხეში?“ „გაგიჟდნენ?! ეს უკვე საშინელებაა, რას აპირებენ?!“ „სამცხე-ჯავახეთში ვითარება იძაბება“, „დალაგებულ სიტუაციას ურევენ!“.

მუმლაძე ყველას სიმშვიდისკენ მოუწოდებს და კიდევ ერთხელ აცხადებს, რომ გავრცელებული ინფორმაცია ახალქალაქიდან ახალციხეში სპეცრაზმის გადასროლის შესახებ სიმართლეს არ შეესაბამება.

[თამუნა უჩიძე, ახალციხე]