გაძვირდა თუ არა სასოფლო-სამეურნეო მაღაზიებში საქონლის ფასი

ახალციხის მუნიციპალიტეტში სასოფლო-სამეურნეო ბარათების დარიგება თითქმის დასრულდა. მოსახლეობას ბარათის გამოყენება მიწის დასამუშავებლად ან სასოფლო-სამეურნეო მაღაზიებში საქონლის საყიდლად შეუძლია.

მას შემდეგ, რაც ბარათების განაღდგება დაიწყო, სასოფლო-სამეურნეო მაღაზიებში რიგები დგას, ყველა ცდილობს საჭირო ინვენტარი და პროდუქცია დროულად შეიძინოს.

ახალციხის მუნიციპალიტეტის გამგეობის წარმომადგენლების განმარტებით, გავრცელდა ინფორმაცია, რომ სასოფლო-სამეურნეო მაღაზიებში საქონელი მომატებულ ფასებში იყიდება. ამიტომ, მუნიციპელიტეტის გამგეობისა და შემოსავლების სამსახურის სამცხე-ჯავახეთის სექტორის წარმომადგენლებმა ახალციხის მუნიციპალიტეტში არსებული სასოფლო-სამეურნეო მაღაზიები მოინახულეს.

ადგილობრივი ხელისუფლების წარმომადგენლებმა მაღაზიის მეპატრონეებისა და მოსახლეობისგან ინფორმაცია მიიღეს, როგორ მუშაობს აღნიშნული მაღაზიები ბოლო პერიოდში და გაძვირდა თუ არა სასოფლო-სამეურნეო საქონელი.

”განვახორციელეთ შემოვლა და არავინ არ ადასტურებს იმას, რომ სასოფლო-სამეურნეო ბარათებთან დაკავშირებით მსგავსი ფაქტები დაფიქსირდა. მეწარმეები ამბობენ, რომ რა ფასშიც აქამდე იყიდებოდა საქონელი, ახლა იგივე ფასებში იყიდება და არანაირი გაძვირება ამ ეტაპზე არ იგეგმება”, - განაცხადა ახალციხის მუნიციპალიტეტის გამგებლის მოვალეობის შემსრულებელმა ბესიკ ბლიაძემ.

სასოფლო-სამეურნეო ბარათების განაღდება ახალციხის მუნიციპალიტეტის შვიდ მაღაზიაშია შესაძლებელი.მაღაზიის მეპატრონეები ამბობენ, რომ სასოფლო-სამეურნეო საქონელზე ფასები არ გაძვირებულა.

”ის, რომ ფასებმა მოიმატა, მცდარი ინფორმაციაა. არსებობს გარკვეული პროდუქტები, რომელზეც ფასები წლიურად იმატებს, ხუთი ან ათი პროცენტით. მაგრამ, ამ ბარათების პროექტში მასიურად რომ გადავხედოთ ფასებს, პირიქით დაიწია, 70-80 პროცენტი პროდუქციაზე, - განმარტავს სასოფლო-საკონსულტაციო სამსახურის აგრო-მაღაზია ”ფერმერის” დირექტორი გურამ ჯინჭველაძე და ამატებს, რომ არსებობს პრეპარატები, რომელზეც ფასების მცირე მატება ყოველწლიურად ხდება და აღნიშნული პროექტის დროს არ გაძვირებულა - ეს ჩვეულებრივი საბაზრო ეკონომიკაა. ფასების მატება ჩვეულებრივი მოვლენაა ინფლაციასთან ერთად მთელი საქართველოს მასშტაბით”.

ერთ-ერთი პრობლემა, რომელიც სასოფლო-სამეურნეო ბარათებთან დაკავშირებით შეიქმნა, არის ის, რომ ბარათის გასანაღდებლად მაღაზიაში ბარათის მფლობელი ვერ მიდის.

”ბარათში უნდა დაიწეროს წარმომადგენლის პირადი ნომერი, რომელიც ბარათს ანაღდებს. ამ მხრივ გარკვეული პრობლემები შეგვექმნა, ბარათები ვერ გავუნაღდეთ და გლეხები უკან გავაბრუნეთ, რომ სოფლის რწმუნებულთან გაარკვიონ”, - ამბობს მაღაზია ”ჯორჯიან797”-ის მეპატრონე რობერტ კუკურჩიანი.

მოსახლეობა სასოფლო-სამეურნეო ბარათებით კმაყოფილია. მაგრამ ამბობენ, რომ აუცილებელია ბარათი ერთ ჯერზე მთლიანად გაანაღდონ.

”რაც მინდა ყველაფერი ერთად არ არის და ცალკ-ცალკე არ გვაძლევენ. 100 ლარიანი ბარათი მაქვს და ერთ ჯერზე ყველაფრის ყიდვას ვერ ვახერხებ”, - ამბობს თენგიზ ბერუაშვილი.

ახალციხის მუნიციპალიტეტის გამგეობაში განმარტავენ, რომ აღნიშნულ საკითხთან დაკავშირებით მაღაზიის მეპატრონეებთან კონსულტაციებს გამართავენ, რადგან მოსახლეობამ საჭირო პროდუქციის შექმნა ეტაპობრივადაც შეძლოს.

ახალციხის მუნიციპალიტეტის გამგებლის მოვალეობის შემსრულებლის თქმით, ვიდრე სასოფლო-სამეურნეო ბარათების განაღდების პროცესი არ დასრულდება ადგილობრივი ხელისუფლების წარმომადგენლები სისტემატურად გააკონტროლებენ, რომ რაიმე სახის დარღვევა არ მოხდეს.



[თამარ თოთაძე, ახალციხე]