„ანთიმოზობა“ უდეში

სოფელ უდეში ანთიმოზ ივერიელის დღის აღსანიშნავად დილიდან რეგიონის პირველი პირები, დეპუტატები და მიწვეული სტუმრები შეიკრიბნენ.

დღესასწაულის აღნიშვნა უდეს ღვთისმშობლის სახელობის ტაძარში 10:00 საათზე საზეიმო წირვით დაიწყო. ღვთისმსახურება ახალციხისა და ტაო–კლარჯეთის მიტროპოლიტმა თეოდორემ ხორნაბუჯელ ეპისკოპოს დიმიტრისთან ერთად აღავლინა.

„დღეს ჩვენ იმ წმინდანის დღეს აღვნიშნავთ, რომელიც ორი ერის გამაერთიანებელია. ამიტომ ამ დღეს მხოლოდ უდეში კი არა, რუმინეთშიც დღესასწაულით აღნიშნავენ. ივერიელი მესხი იყო და არის ვარაუდიც, რომ იგი სწორედ უდეში დაიბადა, რაც ამ სოფლისთვისაც ძალიან მნიშვნელოვანია,“ – ამბობს მიტროპოლიტი თეოდორე.

წირვის დასრულების შემდეგ მან საქართველოში რუმენითის ელჩს რადუ–ლივიუ ჰორუმბას საჩუქრად წმინდა ნინოს ხატი გადასცა.

„ეს ძალიან მნიშვნელოვანი დღეა. განსაკუთრებული წმინდანი გვყვავს, რომელიც საქართველოსა და რუმინეთს ერთმანეთთან აკავშირებს, ამიტომ მიხარია რომ დღეს აქ ვარ“, – განაცხადა რადუ–ლოვიუ ჰორუმბა.

ტაძრიდან სტუმრებმა სოფლის ცენტრში გადაინაცვლეს. აქ ადგილობრივი ცეკვისა და სიმღერის ანსამბლების კონცერტი გაიმართა. ამის პარალელურად მოწვეულ სტუმრებს უდეს სამრველო სკოლის შშმ პირთა ნახატებისა და სხვა ხელნაკეთი ნივთების დათვალიერება შეეძლოთ. აქვე ჭადრაკში უდის ღია პირველობაში ერთმანეთს მსურველები სხვადასხვა ასაკობრივ კატეგორიაში ეჯიბრებოდნენ. პირველ, მეორე და მესამე ადგილზე გასულებს მედლები, სიგელები და სიმბოლური საჩუქრები გადაეცათ.

„მე მინდა ერთი მთავარი ვთქვა, რასაც ანთიმოზ ივერიელი გვასწავლის, რომ ადამიანი, რომელსაც აქვს თავისი სისუფთავე, რომელიც იბრძვის სიკეთისთვის და სიმართლისთვის, ყოველთვის იქნება გამარჯვებული, სადაც არ უნდა იყოს. ახალგაზრდობას მოვუწოდებ სწავლისკენ, სიკეთისკენ და კეთილდღეობისკენ“–განაცხადა ახალციხე–ადიგენის მაჟორიტარმა დეპუტატმა გიორგი კოპაძემ.

ანთიმოზ ივერიელის ხსენების დღისადმი მიძღვნილ ღონისძიებასთან დაკავშირებვით, ადიგენის მუნიციპალიტეტის გამგეობამ ადგილობრივი ბიუჯეტიდან 2 025 ლარი გამოყო.

შეგახსენებთ, რომ „ანთიმოზობა“ უდეში 2005 წლიდან აღინიშნება. დღესასწაული ცნობილი საეკლესიო და საერო მოღვაწის, ანთიმოზ ივერიელის, როგორც ამ სოფლის მკვიდრის ხსოვნის პატივსაცემად იმართება.

ანთიმოზ ივერიელი საქართველოდან ოსმალებმა გაიტაცეს. სტამბოლში ტყვეობიდან გამოისყიდა იერუსალემის პატრიარქმა, მის კარზევე მიიღო განათლება. იცოდა რამდენიმე ევროპული და აღმოსავლური ენა. XVII საუკუნის 80–იანი წლების ბოლოს ანთიმოზ ივერიელი მიიწვია ვლახეთის მთავარმა კონსტანტინე ბრინკოვიანუმ. ანთიმოზ ივერიელმა მთელი თავისი მოღვაწეობა მიუძღვნა რუმინული ეროვნული კულტურის აღორძინების საქმეს. ამ დროს იქაურობას განაგებდა კონსტანტინე ბრინკოვიანუ, რომლის განმგებლობის წლები რუმინეთის კულტურის აყვავების ხანად ითვლება. ანთიმოზ ივერიელის, როგორც მესტამბის, პირველი ნაბიჯები დაკავშირებულია ბუქარესტის სტამბასთან, სადაც მან 1691 წელს დაბეჭდა პირველი წიგნი. სასტამბო მოღვაწეობასთან ერთად, მან დიდი წვლილი შეიტანა რუმინული სალიტერატურო ენის განვითარებაში. ამავე საქმეს ემსახურებოდა მისი მოთხოვნა - მღვდელმსახურება აღსრულებულიყო რუმინულ ენაზე. დიდია ანთიმოზ ივერიელის ღვაწლი ქართული სტამბის დაარსებაში. თბილისში სტამბას საფუძველი ჩაუყარა მისმა მოწაფემ მიხაილ იშტვანოვიჩმა. 1709 წელს ამ სტამბაში დაიბეჭდა „სახარება“. როგორც პოლიტიკური მოღვაწე, იბრძოდა რუმინეთის დამოუკიდებლობისათვის, ხალხს მოუწოდებდა ოსმალეთის წინააღმდეგ საბრძოლველად. რადიკალურმა კურსმა მთავართან დააპირისპირა, რასაც ანთიმოზ ივერიელისთვის სასულიერო ღირსების აყრა და ექსორია მოჰყვა. სინას მთას მიმავალი გზაში მოკლეს.

25 წლის წინ, 1992 წელს რუმინეთის ეკლესიამ ანთიმოზ ივერიელი წმინდანად შერაცხა.

[ლუბა გიორგაძე, ადიგენი]