საქართველოს პირველი ლედის ძმას სასამართლომ 4 წლით პატიმრობა მიუსაჯა

„საქმის მასალების თანახმად, 2017 წლის 11 იანვარს, მიხეილ მგალობლიშვილის პირადი ჩხრეკის შედეგად ამოღებულ იქნა ბრაუნინგის კონსტრუქციის 1922 წლის მოდელის 7.65 მმ-იანი კალიბრის პისტოლეტი ერთი მჭიდით, მასში მოთავსებული 1900 წლის ნიმუშის 7.65მმ კალიბრის ერთი ცალი ვაზნით. ასევე, მიხეილ მგალობლიშვილის საცხოვრებელი სახლის ჩხრეკისას, სამართალდამცველებმა ამოიღეს ქარხნული წესით წარმოებული, 1934 წლის 7.65 მმ ცეცხლსასროლი იარაღი, რომელიც გადაკეთებულია 1951 წლის ნიმუშის 9მმ კალიბრის ვაზნების გასასროლად. აღნიშნული ნივთები, შესაბამისად, მიეკუთვნება ცეცხლსასროლი იარაღისა და საბრძოლო მასალის კატეგორიას.

ღია სასამართლო სხდომებზე, ბრალდებულმა დაადასტურა აღნიშნული ნივთების შენახვა და ტარება, თუმცა მიუთითა რომ ისინი მემკვიდრეობით მიიღო მამისგან.

მიუხედავად ნივთის შეძენის ფორმისა, სასამართლომ მიხეილ მგალობლიშვილი დამნაშავედ ცნო, რადგან ცეცხლსასროლი იარაღი და საბრძოლო მასალა, როგორც სამოქალაქო, თავისუფალი ბრუნვიდან ამოღებული ნივთები, ექვემდებარება სპეციალურ აღრიცხვას და შესაბამისი უფლების რეგისტრაციას“, - ნათქვამია სასამართლოს განაჩენში.

საქართველოს პირველი ლედი მაკა ჩიჩუა, მისი ძმის მიმართ გამოტანილ განაჩენს არ ეთანხმება. როგორც ჩიჩუამ ჟურნალისტებს განუცხადა, იარაღი, რომლის გამოც მისი ძმა დააკავეს, უვარგისია და ფაქტობრივად სამუზეუმო ექსპონატია.

[sknews.ge]