რატომ არ იწყება ბოლაჯურის 'რწმუნებულის' საქმის არსებითი განხილვა

ბოლაჯურის ყოფილი რწმუნებულის, როლანდ ჩხიტუნიძის საქმეზე, თბილისის საქალაქო სასამართლოში პირველი, არსებითი განხილვა გუშინ, 14 მარტს უნდა გამართულიყო თუმცა ადვოკატის შუამდგომლობით გადაიდო.

როგორც „სამხრეთის კარიბჭესთან“ ყოფილი რწმუნებულის ადვოკატი მერაბ ცუხიშვილი აცხადებს, გამოძიების პროცესი ისევ მიმდინარეობს:„ახალი დოკუმენტებია საქმეზე გამოსაკვლევი და ამიტომ არსებითი განხილვის დაწყება ვერ ხერხდება“.

მისივე თქმით, ეს პირველი პროცესი არ ყოფილა, რომელიც დაცვისა და ბრალდების მხარის შუამდგომლობით გადაიდო. ჩხიტუნიძეს აღკვეთის ღონისძიებად პატიმრობა სასამართლომ, ჯერ კიდევ 2016 წლის ნოემბრის თვეში შეუფარდა, მას შემდეგ კი დაახლოებით 5–მდე სასამართლო სხდომა გადაიდო.

კონკრეტულად რა მტკიცებულებებს იკვლევენ მხარეები და რა შანსებია იმისათვის, რომ სასამართლომ ჩხიტუნიძის მიმართ გამამართლებელი განაჩენი გამოიტანოს, ადვოკატი დეტალებზე არ საუბრობს.

„ბრალდებულის ინტერესებიდან გამომდინარე, დეტალებს ვერ მოგიყვებით, ვიდრე სასამართლო სხდომები არ დასრულდება. განაჩენს რაც შეეხება, წინასწარ ვერაფერს გეტყვით, დეტალებში იმალება ძაღლის თავი“, – გვეუბნება მერაბ ცუხიშვილი და ამატებს, რომ სამართლიანი სასამართლოს იმედი აქვს.

შეგახსენებთ, რომ ანტიკორუფციულმა სააგენტომ, გამგებლის წარმომადგენელი ბოლაჯურის ადმინისტრაციულ ერთეულში, 2016 წლის 24 ნოემბერს დააკავა. გამოძიების ინფორმაციით, როლანდ ჩხიტუნიძემ მოქალაქეს საქონლის ყალბი წარმომავლობის ცნობის დამზადების სანაცვლოდ ქრთამის სახით მოსთხოვა და გამოართვა 2000 ლარი, რა დროსაც იგი ბრალდებულის სახით დააკავეს.

გამოძიება ქრთამის აღების ფაქტზე მიმდინარეობს, საქართველოს სსკ-ს 338-ე მუხლის 1-ლი ნაწილით, რაც სასჯელის სახით ითვალისწინებს თავისუფლების აღკვეთას ვადით 6 დან 9 წლამდე.

[ლუბა გიორგაძე, ადიგენი]