300–მა მოსწავლემ საგაზაფხულო არდადეგები ბაკურიანში გაატარა

მოსწავლეები ბაკურიანში, 8 მარტიდან ისვენებდნენ და საკუთარ სახლებს დღეს, 14 მარტს დაუბრუნდებიან. ერთი კვირის განმავლობაში ისინი სამთო–სათხილამურო სპორტის აქტივობებში იყვნენ ჩართულნი.

როგორც განათლების სამინისტროში აცხადებენ, ჯანსაღი ცხოვრების წესის მხარდამჭერი პროგრამის განხორციელება საქართველოს განათლების მინისტრის, ალექსანდრე ჯეჯელავას ინიციატივა იყო.

„პროგრამა მოსწავლეებს მოტივაციას გაუჩენს უფრო აქტიური ცხოვრებით იცხოვრონ, დაინტერესდნენ სპორტის სახეობებით და ბანაკებში შეძენილი უნარ-ჩვევები ყოველდღიურ ცხოვრებაში გამოიყენონ, გაუწიონ სპორტს პოპულარიაზაცია თანატოლებში. სწორედ მოსწავლეების გააქტიურება და ჯანსაღი მომავალი თაობის აღზრდაა პროგრამის მთავარი მიზანი“, –აცხადებენ განათლებისა და მეცნიერების სამინისტროში.
სამინისტროს ინფორმაციით, მსგავსი პროგრამა, სასკოლო არდადეგების პერიოდში, მომავალშიც განხორციელდება.

საქართველოს მასშტაბით, სკოლებში საგაზაფხულო არდადეგები 3 მარტიდან დაიწყო, სასწავლო პროცესი ხვალ, 15 მარტს განახლდება.

[ლუბა გიორგაძე, ახალციხე]