30.10.2018 - ცენტრალური საარჩევნო კომისიის ინფორმაციით, 3705 უბნიდან ყველა დათვლილია. იმის გამო, რომ 50%-იანი ბარიერი ვერცერთმა კანდიდატმა ვერ გადალახა, მეორე ტური გაიმართება. არჩევნების ჩატარების ბოლო ვადა ორი დეკემბერია.
29.10.2018 - 28 და 29 ოქტომბერს, სამცხე–ჯავახეთის საოლქო კომისიებში 33 საჩივარი შევიდა, აქედან ყველაზე მეტი 14 ახალქალაქში, ხოლო ყველაზე ცოტა,ორი ნინოწმინდაში დაიწერა. ადიგენისა და ასპინძის საოლქო კომისიებში კი ამ დრომდე არცერთი საჩივარი არ დარეგისტრირებულა.
29.10.2018 - შინაგან საქმეთა ყოფილი მინისტრი ვანო მერაბიშვილი, სოციალურ ქსელში, გაერთიანებული ოპოზიციის კანდიდატს გრიგოლ ვაშაძეს მეორე ტურში გასვლას ულოცავს.
29.10.2018 - ენმ–ს კანდიდატმა გრიგოლ ვაშაძემ ადიგენში არჩევნები მხოლოდ ორ უბანში, ვანო მერაბიშვილის სოფელში, უდეში მოიგო.
29.10.2018 - სამცხე–ჯავახეთის ექვსი ოლქიდან მხოლოდ ერთია ისეთი, რომელშიც ვაშაძემ ზურაბიშვილს ვერცერთი უბანი ვერ მოუგო. სხვა მუნიციპალიტეტებში უბნების ნაწილზე ენმ–ს კანდიდტმა „ოცნების“ მხარდაჭერილ კანდიდატზე მეტი ხმა მიიღო.
29.10.2018 - “ევროპული საქართველოს” ლიდერი დავით ბაქრაძე ოპოზიციურ პარტიებს მეორე ტურისთვის საერთო შტაბის შექმნას სთავაზობს.
29.10.2018 - ცესკოს მიერ 3 705 უბნიდან დათვლილია 3693 უბანი, რომლის თანახმადაც სალომე ზურაბიშვილს გრიგოლ ვაშაძეზე 14 424 ხმით მეტი აქვს.
29.10.2018 - მოძრაობა „ძალა ერთობაშიას“ საპრეზიდენტო კანდიდატის გრიგოლ ვაშაძის განცხადებით, ხელისუფლების მცდელობა უშედეგოდ დასრულდა და გამარჯვებას მეორე ტურში თავად მოიპოვებს.
29.10.2018 - „საერთაშორისო გამჭვირვალობა - საქართველოს” განცხადებით საპრეზიდენტო არჩევნებმა ძირითადად მშვიდ გარემოში, მნიშვნელოვანი ძალადობრივი ინციდენტების გარეშე ჩაიარა. გამოიკვეთა რამდენიმე პრობლემური ტენდენცია, თუმცა არჩევნების შედეგზე გავლენა არ მოუხდენია.
29.10.2018 - ცენტრალური საარჩევნო კომისიის თავმჯდომარის თამარ ჟვანიას განმარტებით, არჩევნების საბოლოო შედეგი 20 დღის ვადაში გამოქვეყნდება. შედეგების გამოცხადებიდან ორი კვირის ვადაში დაინიშნება საპრეზიდენტო არჩევნების მეორე ტური.
29.10.2018 - N41 ნინიწმინდის საოლქო საარჩევნო კომისიამ უბნების შედეგები სრულად დაითვალა.
29.10.2018 - N40 ახალქალაქის საოლქო საარჩევნო კომისიამ არჩევნების შედეგები შეაჯამა. ხმათა უმრავლესობით არჩევნებში მმართველი გუნდის მხარდაჭერილმა კანდიდატმა სალომე ზურაბიშვილმა გაიმარჯვა.
29.10.2018 - N36 ბორჯომის საოლქო საარჩევნო კომისიამ უბნების მონაცემები შეაჯამა. ხმათა უმრავლესობით აქ სალომე ზურაბიშვილმა გაიმარჯვა.
29.10.2018 - ასპინძის ოლქში 23 უბნის შედეგები შეჯამებულია. ხმათა უმრავლესობით აქ მმართველი გუნდის მიერ მხარდაჭერილმა კანდიდატმა სალომე ზურაბიშვილმა გაიმარჯავა.
29.10.2018 - ადიგენის საარჩევნო ოლქში 18 უბნის შედეგები შეაჯამეს. წინასწარი მონაცემებით აქ სალომე ზურაბიშვილი ლიდერობს.
29.10.2018 - ახალციხეში 35–ვე საარჩევნო უბნის შედეგები დათვლილია. წინასწარი მონაცემებით ხმების 46% ზურაბიშვილმა მიიღო.
29.10.2018 - ცესკოს მიერ 3 705 უბნიდან დათვლილია 1 103 უბანი, რომლის თანახმადაც სალომე ზურაბიშვილმა 42.2% მიიღო, ხოლო გრიგოლ ვაშაძემ 34.89%
29.10.2018 - ცენტრალურმა საარჩევნო კომისიამ წინასწარი შედეგები გამოაქვეყნა. ამ დროისთვის, ხმები დათვლილია ქვეყნის 512 საარჩევნო უბანზე, რაც საერთო რაოდენობის 13%–ია.
29.10.2018 - „ევროპული საქართველო“ არჩევნების მეორე ტურის გამართვის შემთხვევაში, გრიგოლ ვაშაძეს დაუჭერს მხარს. ამის შესახებ ბაქრაძემ პარტიის ცენტრალურ ოფისში გამართულ ბრიფინგზე, ეგზიტპოლის შედეგების გამოქვეყნების შემდეგ განაცხადა.
29.10.2018 - პარლამენტის თავმჯდომარის ირაკლი კობახიძის განცხადებით, ამ ეტაპისთვის ცხადია, რომ საპრეზიდენტო არჩევნების მეორუ ტური გაიმართება. მისი თქმით, ამ დროისთვის 1000-მდე უბნის მონაცემებია დათვლილი.