'მე ვირჩევ' – ყველაფერი არჩევნების შესახებ

სპეციალურ, 8–გვერდიან ჩანართში, რომელიც ქართულ და სომხურ ენებზე მომზადდა, წაიკითხავთ:

"საპარლამენტო არჩევნები – როგორც დემოკრატიის ტესტი" – რატომაა აუცილებელი, რომ ქვეყანაში გაგრძელდეს პოლიტიკური პროცესების წარმართვა არჩევნების გზით, დემოკრატიულად და არა ქუჩაში გამოსვლებით და რატომ არის 2016 წლის 8 ოქტომბრის საპარლამენტო არჩევნები ქვეყნისთვის დიდი გამოწვევა.

"ამომრჩეველთა ნიჰილიზმი და ერთი ხმის ძალა" – საქართველო 2016 წლის საპარლამენტო არჩევნებისთვის ემზადება. ამომრჩეველთა ნაწილი არჩევნებზე წასვლას გეგმავს, ნაწილი კი არა. ორივე ნაწილს თავისი არგუმენტები აქვს, პოლიტოლოგები კი მათ არგუმენტებს ცალსახა პოზიციას უპირისპირებენ – ყველა ხმა ძალაა – ამბობენ ისინი და მოსახლეობას აქტივობისკენ მოუწოდებენ.

"ვის და რატომ ვირჩევთ 8 ოქტომბერს" – პარლამენტი, მისი ფუნქცია–მოვალეობები, არჩევის წესი და კოდექსში შესული ცვლილებები; სამართლიანია თუ არა არსებული მოდელი და რას ფიქრობს ხალხი საკანონმდებლო ორგანოზე;

"სახელმწიფო მოწყობა საქართველოში და მაგალითები მსოფლიოდან" – სულ რაღაც ერთ თვეში, საქართველოში მცხოვრებლებმა ქვეყნის საკანონმდებლო ორგანოს ახალი შემადგენლობა უნდა აირჩიონ. „სამხრეთის კარიბჭე“დაინტერესდა, რა იციან ადგილობრივებმა პარლამენტის და ზოგადად, ქვეყნის მოწყობის შესახებ.

ასევე, ჩანართში შეგიძლიათ წაიკითხოთ,
➡️ ვინ იყვნენ მაჟორიტარობის კანდიდატები წინა, 2012 წლის საპარლამენტო არჩევნებში და რა შედეგით დასრულდა საარჩევნო ბრძოლა;
➡️ საინტერესო ცნობები პარლამენტზე – მაგალითად, ვინ იყო საქართველოს პირველი მოწვევის პარლამენტის თავმჯდომარე;
➡️ რამდენი და რომელი არჩევნები ჩატარდა საქართველოში 1990 წლიდან დღემდე;როდის იყო ამომრჩეველთა აქტივობა ყველაზე მეტი;
➡️ რა არის დემოკრატია; რატომ უნდა მივიღოთ მონაწილეობა დემოკრატიულ პროცესებში და რა გავლენას ახდენს ეს ჩვენზე;
➡️ რა არის დასაშვები და რა არა წინასაარჩევნო აგიტაციისას;
➡️ რისი უფლება აქვს ამომრჩეველს;
➡️ და ა.შ.

ჩანართი, სახელწოდებით – "მე ვირჩევ", "სამხრეთის კარიბჭეს" პროექტის "ინფორმირებული არჩევანი – დემოკრატიის საფუძველი" ფარგლებში მომზადდა. პროექტი საარჩევნო სისტემების განვითარების, რეფორმებისა და სწავლების ცენტრის ფინანსური მხარდაჭერით ხორციელდება.

ჩანართის პირველი ნომერი 10.000–იანი ტირაჟით დაიბეჭდა, აქედან 5.000 ქართული ეგზემპლარია, ამდენივე კი სომხური.



[sknews.ge]