ხვალიდან პენსია 20 ლარით იზრდება

ჯანდაცვის მინისტრის დავით სერგეენკოს განცხადებით, პირველი ივლისიდან პენსია 20 ლარით, შეზღუდული შესაძლებლობების მქონე პირებს, მკვეთრად გამოხატულ კატეგორიას და ბავშვებს, ასევე ასაკით პენსიონერებს გაეზრდებათ.

მისივე თქმით, ბოლო 4 წლის განმავლობაში, პენსიის ჯამური ბიუჯეტი გაიზრდა.

„თუკი ჯამური ბიუჯეტი 2012 წელს 1,045 მილიარდი ლარი იყო, წელს ეს არის 1,570 მილიონი ლარი, ანუ საპენსიო ანაზღაურება ნახევარ მილიარდზე მეტით გაიზარდა“, - განაცხადა დავით სერგეენკომ და დაამატა, რომ 2012 წელს თუ მონაცემთა ბაზაში 680.000 პენსიონერი იყო რეგისტრირებული, დღეს 713.000-ია.

მინისტრის ინფორმაციით, პენსიებთან დაკავშირებული ცვლილებები ძალაში პირველი სექტემბრიდანაც შევა. კერძოდ, მაღალმთიან დასახლებაში მცხოვრები ასაკით პენსიონერების პენსია 20%-ით გაიზრდება და 216 ლარი გახდება.

[ლუბა გიორგაძე, ახალციხე]