მექანიზაციის დღე ზემო სხვილისში

სახნავი, სათესი, სათიბი და საფრეზი მოწყობილობა და მიწათმოქმედების სხვა იარაღი ზემო სხვილისში 20–მდე მექანიზატორმა გამოფინა. სასოფლო–სამეურნეო ტექნიკა მათ "რეგიონული განვიტარების ასოციაციის“ (RDA) პროექტის, "ადგილობრივი მოსახლეობის განვითარების ინიციატივის“ ფარგლებში შეიძინეს.

პროექტის ერთ–ერთი კომპონენტის, დამწყები ბიზნესის ხელშეწყობის ფარგლებში, სასურველი ტექნიკის შესაძენად, მათ პროექტები დაწერეს და ასოციაციისგან 2 600 ლარის ოდენობით გრანტი მიიღეს.

"წელს შევიტანე პროექტი. გასაუბრებაც მქონდა, შემდეგ ეტაპზე კი დამიფინანსეს სათიბელა. 2 600 ლარით მათ დამაფინანსეს, 30%, 700 ლარი ჩემი მონაწილეობა იყო. ტრაქტორიც მყავდა და თიბვა დავიწყე. ერთი დღის განმავლობაში სამი ჰექტრის მოთიბვას ვახერხებ. ჩემი შემოსავლის წყაროა. შემდეგში ფოცხის შეძენა მინდა, თუ გამოცხადდება პროექტი“,– ამბობს სოფელ ზემო სხვილისის მკვიდრი ზაალ ხითარიშვილი.

"ადგილობრივი მოსახლეობის განვითარების ინიციატივა“ (CDI) კომპანია BP-ს დაფინანსებით, ბაქო-თბილისი-ჯეიჰანის მილსადენის გასწვრივ მდებარე, სამცხე–ჯაავხეთის 33 სოფელში ხორციელდება.

"ჩვენ გვაქვს რამდენიმე მიმართულება, რომლითაც ვცდილობთ მოსახლეობის სოციალურ–ეკონომიკური მდგომარეობის გაუმჯობესებას, ერთ–ერთი არის მცირე, დამწყები ბიზნესის ხელშეწყობა. თითქმის ყოველ წელს ვაცხადებთ კონკურსებს. მაქსიმალური დაფინანსების ზღვარი, დამწყებ ბიზნეს კომპონენტში, ჩვენი მხრიდან 2 600 ლარია და თავისი წილი მინიმუმ 30 % უნდა იყოს“, - ამბობს პროექტ "ადგილობრივი მოსახლეობის განვითარების ინიციატივის“ დირექტორი ნიკოლოზ საყვარელიძე.

[თაკო ფეიქრიშვილი, ახალციხე]