აშშ–ს საელჩოს შეთავაზება მედია, არასამთავრობო და საგანმანათლებლო ორგანიზაციებს

შეხვედრა დღეს, 18 დეკემბერს, ახალციხის დემოკრატიული ჩართულობის ცენტრში გაიმართა.

"გვინდა, რომ ამერიკის მთავრობის გაცვლითი საგანმანათლებლო თუ საგრანტო პროგრამები გაგაცნოთ. სხვადასხვა მიმართულებებზე ვმუშაობთ და შესაბამისად ვხვდებით პოტენციურ წარმომადგენლებს სხვადასხვა სფეროებში“ , – ამბობს პროგრამის კოორდინატორი ნინო გაგუა.

მსგავსი შეხვედრა, გუშინ, 17 დეკემბერს ახალქალაქშიც გაიმართა.

„ახალქალაქშიც და ახალციხეშიც კარგად იცნობენ ჩვენს პროგრამებს. მონაწილეები არიან სკოლის მოსწავლეები, ახალგაზრდები, რომლებიც უკვე გაემგზავრნენ ამერიკაში სასწავლებლად“, –ამბობს ნინო გაგუა.

აშშ-ის საელჩომ უკვე გამოაცხადა დემოკრატიის კომისიის მცირე გრანტების პროგრამა. გრანტები გაიცემა შემდეგი მიმართულებით: სამოქალაქო ჩართულობა, საარჩევნო სისტემების ხელშეწყობა, გარემოს დაცვა და მასმედიის განვითარება.

ადგილობრივი არასამთავრობო როგანიზაციების წარმომადგენლების განცხადებით სამცხე–ჯავახეთში და ეთნიკური უმცირესობებით დასახლებულ რეგიონებში უფრო მეტი გრანტები უნდა გაიცეს.

"ამერიკის საელჩოს საქმიანობის შესახებ ხალხმა მეტი უნდა იცოდეს.მოსახლეობაში ამერიკის მიმართ რატომღაც არის უარყოფითი დამოკიდებულება, თითქოს ქართველობას და ეროვნულობას გვართმევენ და სინამდვილეში ძალიან ბევრ კარგ და სასიკეთო საქმეს აკეთებენ. ვფიქრობ, ეს უფრო მეტად უნდა შუქდებოდეს“, – ამბობს "მერსი ქორფსის" "მცირე კავკასიის ალიანსების პროგრამის" გენდერისა და მმართველობის კონსულტანტი ნინო რუხაძე.

შეგახსენებთ, რომ დემოკრატიის კომისიის მცირე გრანტების პროგრამის ადმინისტრირებას ახორციელებს აშშ-ს საელჩოს საზოგადოებასთან ურთიერთობის განყოფილება, ელჩის მოადგილისა და განყოფილების ხელმძღვანელის თავმჯდომარეობით. კომისია გასცემს გრანტებს მაქსიმუმ 24,000 აშშ დოლარის ოდენობით.

კონკურსში მონაწილეობის მსურველებმა ინგლისურ-ქართული და ინგლისურ-რუსული განაცხადის ფორმები შეგიძლიათ ჩამოტვირთოთ საელჩოს ვებ გვერდიდან: http://georgia.usembassy.gov/resources/demcom.html

კონსულტაციისათვის დაუკავშირდით პროგრამის კოორდინატორებს:
სოფიო გეგეჭკორს ტელ.: 2-277-601, gegechkoris@state.gov
ნინო გაგუას ტელ.: 2-277-628 gaguan@state.gov

[თინათინ ზაზაძე, ახალციხე]