ბორჯომში საახალწლო სამზადისი დაიწყო

დღეიდან ბორჯომსა და ბაკურიანში საახალწლო განათებების დამონტაჟებას იწყებენ. უკვე გადაწყვეტილია, რომ ნაძვის ხეს ბორჯომის ცენტრში დადგამენ.

31 დეკემბერს საახალწლო განწყობის შესაქმნელად ბორჯომის ქუჩებში თოვლის ბაბუა ივლის, რომელიც მოსახლეობას საახალწლო წარმოადგენაზე დასასწრებად მოუწოდებს.

საახალწლო წარმოდგენა 31 დეკემბერს 18:00 საათზე დაიწყება.

„კონცერტზე გათვალისწინებულია 2015 წლის წარმატებული ადამიანების: სპორტსმენებისა და ხელოვანების, პედაგოგების, მედიცინის მუშაკებისა და ქალაქის სხვადასხვა სამსახურების წარმატებული თანამშრომლების დაჯილდოება. ღონისძიებას დაასრულებს ფეირვერკი. ასევე ბორჯომის კულტურის სახლი და თოჯინების თეატრი პატარა მაყურებლის წინაშე სპეციალური საახალწლო პროგრამით წარსდგება“, – განმარტავენ ბორჯომის მუნიციპალიტეტის გამგეობაში.

საახალწლო წარმოდგენისთვის ადგილობრივი ბიუჯეტიდან 21.630 ლარი დაიხარჯება.

გარდა ამისა, ბორჯომის მუნიციპალიტეტის გამგეობა სოციალური პროგრამის მიხედვით, საახალწლოდ 400–მდე ბენეფიციარს პირად ანგარიშზე 100 ლარს ჩაურიცხავს. რისთვისაც დაახლოებით 40.000 ლარი დაიხარჯება.

„აღნიშნული პროგრამის მიხედვით დახმარებას მიიღებენ: მრავალშვილიანი დედები, დიდ სამამულო ომში მარჩენალდაკარგული ოჯახები, დედ-მამით ობოლი ბავშვები, 18 წლამდე ასაკის შშმ პირები, დიდი სამამულო ომის ვეტერანები, მათთან გათანაბრებული პირები, საქართველოს მთლიანობისთვის ომის ინვალიდები, მარტოხელა დედები“, – განმარტავენ ბორჯომის მუნიციპალიტეტის გამგეობაში.

[თამარ თოთაძე, ბორჯომი]