ეკონომიკის მინისტრი ახალციხეში მეწარმეებს შეხვდა

სამთავრობო ინიციატივის „აწარმოე საქართველოში“ ახალი კომპონენტის „მიკრო და მცირე მეწარმეობის ხელშეწყობა საქართველოში“ პროგრამის ფარგლებში ვეფხია დიაკონაშვილის საწარმომ „მწყერის სახლმა“ 15 ათას ლარიანი დაფინანსება მიიღო. დიაკონაშვილი ბიზნესის გაფართოებას გეგმავს და აღნიშნული თანხით სამი სხვადასხვა სიმძლავრის ინკუბატორისა და გენერატორის შეძენას აპირებს.

„ნოემბერში გამოგვაცხადეს გამარჯვებულებად. ვაწარმოებ ფრინველებს, ამ ეტაპზე სამიათასამდე მწყერი გყავს. დაფინანსებული თანხით ვაპირებთ გაფართოებას და გვეყოლება ხოხობი, ინდაური ბატი, კვატი და გვინდა შევიძინოთ ფარშევანგის კვერცხები. ასევე სახორცედ ვაპირებთ სირაქლემის მოშენებას“, – ამბობს „მწყერის სახლის“ ხელმძღვანელი ვეფხვია დიაკონაშვილი.

პროექტის ფარგლებში დაფინანსდა მუსხში მცხოვრები ლალი ცუხიშვილის საწარმოც, რომელსაც ლოკოკინების ფერმა აქვს.

„გავაფართოვე ჩემი ბიზნესი, უფრო მეტი ლოკოკინა მეყოლება და შესაბამისად გაიზრდება ჩემი შემოსავლებიც. პროექტის ფარგლებში ჩაგვიტარდა ტრენინგები და მივიღეთ უფრო მეტი გამოცდილება. დაგვაფინანსეს 5 ათასი ლარის ოდენობით“, – ამბობს ლალი ცუხიშვილი.

პროგრამის ფარგლებში სამცხე–ჯავახეთში 153 ხელშეკრულებაა გაფორმებული. დაფინანსებულია 144 ბიზნეს იდეა, რომელიც ჯამში 400–მდე სამუშაო ადგილს შექმნის.

გამარჯვებულ ბენეფიციარებს დღეს, 3 დეკემბერს ეკონომიკის მინისტრი დიმიტრი ქუმსიშვილი, მისი მოადგლე ქეთევან ბოჭორიშვილი და მეწარმეობის განვითარების სააგენტოს დირექტორი ანა კვარაცხელია შეხვდნენ. შეხვედრაზე გამარჯვებულებმა თავიანთი საქმიანობის შესახებ ისაუბრეს.

„ჩვენ დღეს მოვისმინეთ ძალიან კარგი ისტორიები, თუ როგორ გაფართოვდა მეფუტკრეობის, სათბურების, ტიხრული მინანქრის, სამკერვალოს, ლოკოკინის და ა.შ. მიმართულება. რეალურად, ეს არის პროექტი, რომელიც ადამიანებს, ვისაც უნდათ ბიზნესის დაწყება, ეხმარება მის დაწყებაში“, – განაცხადა შეხვედრაზე ეკონომიკის მინისტრმა დიმიტრი ქუმსიშვილმა.

შეხვედრის ბოლოს პროექტის ბენეფიციარებს მინისტრმა სერტიფიკატები გადასცა და რამდენიმე საწარმო ადგილზე დაათვალიერა.

[თინათინ ზაზაძე, ახალციხე]