ახალციხეში მასწავლებელთა სახლი აშენდება

ცენტრის ინფორმაციით, ახალციხეში აშენებული მასწავლებელთა სახლი მთელს სამცხე–ჯავახეთს მოემსახურება. მასწავლებელთა სახლი მასწავლებელთა პროფესიული განვითარების მიმართულებით იფუნქციონირებს და ორგანიზებას გაუწევს როგორც გრძელვადიან და მოკლევადიან ტრენინგებს, ისე სემინარებს, კონფერენციებსა და სხვა ღონისძიებებს.

მასწავლებლის სახლების ამოქმედება სამცხე-ჯავახეთის გარდა, კახეთში, სამეგრელოსა და გურიაშიც იგეგმება. ახალციხესთან ერთად, მასწავლებელთა პროფესიული განვითარების ეროვნული ცენტრის დირექტორმა გიორგი მაჩაბელმა, ტერიტორია თელავშიც დაათვალიერა.

"მასწავლებელთა პროფესიული განვითარების ეროვნულ ცენტრში უკვე დამტკიცებულია კონცეპტუალური მოდელი, რომლის მიხედვით რეგიონებში მასწავლებლის სახლები შეიქმნება", – აცხადებენ მასწავლებელთა პროფესიული განვითარების ეროვნულ ცენტრში.

გიორგი მაჩაბელმა ვიზიტის ფარგლებში ახალციხის N1 საჯარო სკოლაც მოინახულა და პედაგოგებს ახლახან გამოცემული სქემის გზამკვლევი პირადად გადასცა. გზამკვლევში დეტალურადაა განმარტებული მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის ყველა დეტალი, რაც მასწავლებლებსა და სკოლის ადმინისტრაციებს გაუმარტივებს სქემით გათვალისწინებული საქმიანობების განხორციელებას.

[ნინო ნარიმანიშვილი, ახალციხე]