IDFI–ს ინფორმაციით, 2013 წლიდან ხელოვნური აბორტის შემთხვევებმა იკლო

ინფორმაციის თავისუფლების განვითარების ინსტიტუტის ინფორმაციით, 2012 წელს საქართველოში ოფიციალურად ორსულობის შეწყვეტის 39 225 ფაქტი დაფიქსირდა, 2013 წელს – 36 537, 2014 წელს კი, წინასწარი მონაცემებით, – 31 908.

„2004-2012 წლებში ყოველწლიურად შეინიშნებოდა როგორც ხელოვნური ასევე თვითნებური (თავისთავადი) აბორტების შემთხვევების ზრდა. 2013 და 2014 წლის წინასწარი მონაცემების მიხედვით ხელოვნური აბორტების შემთხვევების რაოდენობა ყოველწლიურად დაახლოებით 4000 შემთხვევით კლებულობს. რაც შეეხება თვითნებურ (თავისთავად) აბორტებს, ბოლო წლებშიც კვლავ მზარდი ტენდენცია შეინიშნება და 2014 წელს, წინასწარი მონაცემებით, ბოლო 10 წლის განმავლობაში, ყველაზე ბევრი 5 895 შემთხვევა ფიქსირდება“, – აცხადებენ ინფორმაციის თავისუფლების განვითარების ინსტიტუტში.

ორგანიზაციის მონაცემებით, ორსულობის შეწყვეტის შემთხვევები 15 წლამდე მოზარდების ასაკობრივ კატეგორიაში 2013 და 2014 წლებშიცაა დაფიქსირებული. 2013 წელს 15 წლამდე მოზარდებში აბორტის 32 შემთხვევა დაფიქსირდა (მათ შორის 8 ხელოვნური), ხოლო 2014 წელს წინასწარი მონაცემებით 17 შემთხვევა (მათ შორის 9 ხელოვნური).

განვლილი წლების მსგავსად 2014 წლის მონაცემებითაც აბორტების ყველაზე დიდი წილი 44% (სულ 13 961, მათ შორის ხელოვნური – 12 779) მოდის 20-29 წლამდე ასაკის ჯგუფზე.

„მიუხედავად იმ ფაქტისა, რომ უკანასკნელი ორი წლის განმავლობაში შეინიშნება ხელოვნური აბორტების მაჩვენებლის კლებადი ტენდენცია, 2014 წელს წინასწარი მონაცემებით დაფიქსირებული ოფიციალური რაოდენობა - 26 013 (2014 წლის საბოოლოო მაჩვენებელი სავარაუდოდ გარკვეულწილად გაიზრდება) კვლავ თვალშისაცემია. მაგალითად, თუ შევადარებთ 2014 წელს ხელოვნურად ჩატარებული აბორტების ოფიციალურ მაჩვენებელს, იმავე წელს დაბადებულთა რაოდენობას (60 635) ვნახავთ, რომ დაახლოებით ყოველი მესამე ორსულობა ხელოვნური ჩარევით შეწყდა“.

IDFI –ში ამბობენ, რომ ეს მონაცემები შეიცავს მხოლოდ ოფიციალურად რეგისტრირებულ მაჩვენებელს. სავარაუდოდ, არარეგისტრირებული აბორტების გათვალისწინებით, აღნიშნული მაჩვენებელი გაცილებით მაღალია. მაგალითად, 2013–2014 წლებში ექიმთა პროფესიული პასუხისმგებლობის საკითხი, სპეციალობაში „მეანობა გინეკოლოგია“ დაისვა 6 შემთხვევაში, რომელთაგან ყველაზე დიდ სანქციას წარმოადგენდა 6 თვის ვადით სერთიფიკატის შეჩერება.



"აღსანიშნავია ის ფაქტი, რომ 2014 წლის ოქტომბრის თვეში საქართველოს სისხლის სამართლის კოდექსში შევიდა ცვლილება, რომლის მიხედვითაც უკანონო აბორტების შესახებ კანონში დაწესებული სანქციები გამკაცრდა. უკანასკნელი ცვლილების მიხედვით უკანონო აბორტი დაისჯება საზოგადოებისთვის სასარგებლო შრომით 120-დან 300 საათამდე ვადით, ან თავისუფლების აღკვეთით 1-დან 2 წლამდე. იგივე ქმედება ჩადენილი უკანონო აბორტისათვის მსჯავრდებულის მიერ, რამაც გამოიწვია შვილოსნობის სამუდამოდ მოშლა, ან სხვა მძიმე შედეგი, დაისჯება თავისუფლების აღკვეთით 2-დან 5 წლამდე. უკანონო აბორტი რამაც გამოიწვია სიცოცხლის მოსპობა, დასჯადი გახდება თავისუფლების აღკვეთით 4-დან 6 წლამდე, თანამდებობის დაკავების, ან საქმიანობის უფლების ჩამორთმევით, ვადით 3 წლამდე", - აცხადებენ IDFI– ში.

[ნინო ნარიმანიშვილი, ახალციხე]