სამცხე–ჯავახეთში მცხოვრები სომეხი მოქალაქეების ცხოვრებით სომხეთის ელჩი დაინტერესდა

სომხეთის ელჩს იური ვარდანიანსა და სასულიერო პირებს ადგილობრივი სომეხი მოქალაქეები ქალაქის შემოსასვლელში დახვდნენ. ამის შემდეგ სტუმრები სამხარეო ადმინისტრაციაში, მხარის გუბერნატორს ესტუმრნენ.

შეხვედრა ადგილობრივი მედიისთვის დახურულ კარს მიღმა წარიმართა. შეხვედრის შემდეგ სომხეთის ელჩმა განაცხადა, რომ მხარის პირველ პირთან რამდენიმე საკითხი განიხილა: „როგორც ვიცი, რეგიონში 120 ათასამდე სომეხი მოქალაქე ცხოვრობს და ჩემი ვიზიტის ერთ – ერთი მთავარი მიზანი იყო გამეგო, როგორ გრძნობენ თავს ეს ადამიანები, როგორც ცხოვრობენ, რაიმე პრობლემა ხომ არ აქვთ“.
გუბერნატორმა აღნიშნა, რომ ელჩის ვიზიტი სისტემატურ ხასიათს მიიღებს:
„როგორც ელჩმა თქვა, იქნება ინტენსიური შეხვედრები. მე მზად ვარ კონსტრუქციული საუბრებისთვის, რაც რეგიონს და ზოგადად ქვეყანას წაადგება“.

სამხარეო ადმინისტრაციაში შეხვერის დასრულების შემედგ სომხეთის ელჩი ახალციხის გრიგორ განმანათლებლის სახელობის სომხურ სამოციქულო ეკლესიას ესტუმრა. აქ იგი მრევლსა და სომხურ სათვისტომოს წარმომადგენლებს შეხვდა და ტაძრის ახალი წინამძღვარი ოფიციალურად წარადგინა.

„მადლობა ჩვენ ეპისკოპოს იმისთვის, რომ დამნიშნა ეკლესიის წინამძღვრად. მე მზად ვარ, რომ ჩემი ლოცვით დავეხმარო ჩვენს ხალხს“, – გვითხრა წმინდა გრიგოლ განმანათლებლის სახელობის ტაძრის წინამძღვარმა ღევონთ დიფაშიანმა.

მრევლი მოძღვარს პრობლემებზე ესაუბრა. ერთ–ერთი საკითხი ეკლესიამდე მისასვლელი გზის რეაბილიტაცია იყო.

„მოგეხსენებათ, რომ რაბათის შემოსასვლელიდან ეკლესიამდე მოსასვლელი გზა არის ძალიან ამორტიზებული. როგორც ვიცი, სომხეთის ელჩმა და გუბერნატორმა უკვე იმსჯელეს ამ საკითხზე და უახლოეს პერიოდში გზას გააკეთებენ“, – ამბობს ღევონთ დიფაშიანი.
შეხვედრის დასასრულს სომხეთის ელჩმა მრევლს საეკლესოა წიგნები გადასცა.



[მანანა სარაშვილი, ახალციხე]