მთავრობა მოსახლეობას კომუნალურ დავალიანებას ნოემბრიდან აუნაზღაურებს

პრემიერ–მინისტრმა ანტიკრიზისული გეგმის მესამე ტალღა დააანონსა, რაც გულისხმობს ბიზნესისა და ცალკეული მოქალაქეების სოციალურ მხარდაჭერას.

„ეს გახლავთ ჩვენი მოქალაქეებისთვის ანაზღაურება კომუნალური გადასახადებისა, რომელიც მოიცავს ზამთრის პერიოდს. ეს იქნება ნოემბრიდან 4 თვე და როგორც წინა ეტაპზე, შეეხება თითოეულ ოჯახს, რომელსაც ექნება 200 კილოვატამდე მოხმარებული ელექტროენერგია, 200 კბ მეტრამდე გაზის მოხმარება, წყლისა და დასუფთავების ანაზღაურება. ყველას კარგად უნდა გვესმოდეს, რომ ეს არის ის მინიმუმი, რაც დღეს სახელმწიფოს შეუძლია, რომ მოქალაქეებს მხარში დაუდგეს“, – განაცხადა გიორგი გახარიამ.

მისივე განმარტებით, კომუნალური დავალიანების გადახდა მოსახლეობისთვის არის ერთ-ერთი მნიშვნელოვანი საკითხი, განსაკუთრებით იმ ადამიანებისთვის, რომლებმაც პანდემიისა და გლობალური ეკონომიკური კრიზისის გამო, შემოსავალი დაკარგეს.

[ნუკა სტეფნაძე]