ახალციხის აფთიაქებში ასპირინის დეფიციტია – რატომ ‘გაქრა’ მედიკამენტი

„სამხრეთის კარიბჭე“ ახალციხეში მდებარე ოთხ დიდ სააფთიაქო ქსელს ცხელ ხაზზე დაუკავშირდა. ასევე მოიარა კერძო აფთიაქებიც, თუმცა ერთის გარდა მედიკამენტი არავის ჰქონდა: „არ გვაქვს რამდენიმე დღეა და ზუსტდ არ ვიცით, როდის შემოიტანენ“.

„ჩვენ 10 დღის წინ მივიღეთ 200–მდე „ასპირინი“ და ორ დღეში თითქმის ამოიწურა, არ ვიცი რატომ აღარ გვაწოდებენ. მედიკამენტი ბელორუსიდან შემოდის და ალბათ უჭირს შემოტანა მომწოდებელს.ზუსტად არ ვიცით როდის გვექნება“, – ამბობს ერთ–ერთი კერძო აფთიაქის ფარმაცევტი.

გავრცელებული ინფორმაციით, მოსახლეობამ დიდი რაოდენობით ასპირინი რეგიონში კორონავირუსის შემთხვევების მატების გამო შეიძინა. მათი თქმით, ვირუსი, პირველ რიგში სისხლძარღვებს აზიანებს, ამიტომ, პრევენციის მიზნით, წამლებს იმარაგებენ: „ძალიან გავრცელდა ჩვენს რეგიონში კორონავიურსი, საავადმყოფოებშიც არ აქვთ ადგილები, გავიგეთ, რომ ვირუსის დროს სისხლი სქელდება და გამათხელებელი უნდა დავლიოთ, როგორც ვიცით ამ დროს კარგია ასპირინის მიღება. ამიტომ გახდა ეს წამალი ასეთი მოთხოვნადი, მე მთელი ქალაქი მოვიარე, მაგრამ ვეღარ ვნახე“.

არიან ისეთებიც, რომლებიც ასპირინს წლების განმავლობაში მოიხმარენ, თუმცა გაზრდილი მოთხოვნის ფონზე, ყიდვა უჭირთ.

„დღეს შევიძინე, ერთ აფთიაქში ჰქონდათ, ადრე 45 თეთრი ღირდა, ახლა გააძვირეს. წლებია ვსვამ ამ წამალს, როცა ფეხები მისივდება, ახლა რადგან ვიშოვე ბევრი ვიყიდე“, – ამბობს ახალციხეში მცხოვრები ჰამიკ კირაკოსიანი.

ახალციხის მსგავსად სისხლის გამათხელებელ პრეპარატებზე, მათ შორის ასპირინზე მოთხოვნა გაიზარდა საქართველოს სხვა ქალაქებშიც. სწორედ ამიტომ ინფექციური საავადმყოფოს დირექტორმა თენგიზ ცერცვაძემ განცხადება გაავრცელა, იგი მოუწოდებს მოსახლეობას ექიმის დანიშნულების გარეშე, სისხლის გამათხელებელი მედიკამენტები არ მიიღონ.

„მე მომდის ინფორმაცია, რომ პაციენტები იმარაგებენ კარდიოასპირინს, კარდიომაგნილს, თრომბოასპირინს, ან სვამენ ე.წ. სისხლის გამათხელებელ საშუალებებს ექიმის დანიშნულების გარეშე. ამის რეკომენდაციას ვერ მოგცემთ. სისხლის გამათხელებელი საშუალებები თვითნებურად არ უნდა მიიღონ. მხოლოდ ექიმს შეუძლია გადაწყვიტოს, კონკრეტულად ამა თუ იმ პაციენტმა რომელი გამათხელებელი უნდა მიიღოს. მაგალითად, ასპირინის პრეპარატები მოქმედებს მხოლოდ ტრომბოციტების რგოლზე და სხვა ფაქტორებზე არ მოქმედებს”, – განაცხადა თენგიზ ცერცვაძემ.

ასევე ნახეთ:



[ნუკა სტეფნაძე]