‘ტემპერატურა და სპაზმური ხველა მაქვს’ – ახალციხელი ექიმი

ამბობს, რომ თავი შეუძლოდ 17 ოქტომბერს იგრძნო, მესამე დღეა მკურნალობს და საშუალო სიმძიმის პაციენტად ითვლება.

„ციება დამეწყო, სიცხე, რომ გავისინჯე 37,5 მქონდა, მომენტალურად დამეწყო სპაზმური ხველაც არაფერმა მიშველა. მეორე დილით გავიტესტე და დამიდასტურდა კოვიდი. მალევე მოვხვდი სტაციონარში, გამიკეთეს ყველა სახის ანალიზი, სისხლის საერთო, კოაგულოგრამა, პოტრომბინი და ბევრი სხვა რამ. გადასხმებიც რამაც ცოტა შემიმსუბუქა ხველა და ტემპერატურამაც დაიწია“, – გვიყვება ექიმი.

იგი ბოქსირებულ პალატაში მკურნალობას სამ თანამშრომელთან ერთად გადის, ამბობს, რომ ყველას ერთნაირი სიმპტომები აქვს, მაგრამ მკურნალობა ინდივიდუალურია.

„ჩემთან ერთად არის კიდევ სამი თანამშრომელი ბოქსირებულ პალატაში ერთად ვართ, რადგან ერთი კლასტერი ვართ. რაც შეეხება მკურნალობას ჩარჩოში მოქცეული არ არის, სიმპტომურად გვმკურნალობენ. მომსახურებაც ძალიან კარგია და კვებაც“.

ექიმი ამბობს, რომ დაინფიცირების წყარო არ იცის, კლინიკაში თავს პირბადით და სადეზინფექციო ხნსარებით იცავდა.

„ჩვენთან კლინიკაში ყოველ შესვლაზე ისინჯება სიცხე. პაციენტებიც ავსებენ ოთხპუნქტიან ტესტს კოვიდთან დაკავშირებით, გადადება შეიძლება ყოფილიყო გარედან, ამას არ გამოვრიცხავ“.

პედიატრი ადგილობრივებს ურჩევს არ დამალონ სიმპტომები და დროულად მიმართონ ექიმს, რათა თავიდან მოხდეს ვირუსის გავრცელება.

„ხშირია, როცა პაციენტი სუფთა ზონაში [კლინკაში და არა ცხელების ცენტრში] მოდის გასასიჯად და მას აქვს ტემპერატურა, მოსვლამდე კი სვამს პარაცეტამოლს, ეს არ შეიძლება, მე ვთხოვ ყველას და ვურჩევ არ დამალონ სიმტომები და არ დალიონ სიცხის დამწევები, რადაგნ ის შეიძლება იყოს კოვიდმატარებელი. პირველ რიგში ტელეფონით უნდა დაუკავშირდნენ ოჯახის ექიმს და ის გადაწყვეტს როგორ უნდა მოიქცეს პაციენტი. ჩვენთან დაფარული პაციენტებიც და უსიმპტომოეობიც ბევრი შემოდიოდა. მე სულ პირბადით და სადენზინფექციოებით დავდიოდი, მაგრამ მაინც დავინფიცირდი“.

ამბობს, რომ მისი კონტაქტები ბევრი არ არის, მხოლოდ ოჯახის წევრები და რამდენიმე თანამშრომელი, ისინი თვითიზოლაციაში იმყოფებიან.

21 ოქტომბრის მონაცემებით, სამცხე–ჯავახეთში კორონავირუსის 150 შემთხვევაა დაფიქსირებული. მედიკოსების დაინფიცირების გამო ახალციხის სასწრაფო სამედიცინო დახმარების ცენტრი დროებით დაიკეტა, გადავსებული პალატების გამო პაციენტებს ვეღარ ღებულობენ კლინიკა "იმედი" და ახალციხის რეფერალური ჰოსპიტალი.


[ნუკა სტეფნაძე]