‘დაუპიპინე ბიძინას’ – ‘ევროპული საქართველოს’ აქციას ახალციხიდან უერთდებიან [ვიდეო]

“ევროპული საქართველოს” ახალციხე-ადიგენი-ასპინძა-ბორჯომის მაჟორიტარი დეპუტატობის კანდიდატი, ზურაბ ჩილინგარაშვილი ამბობს, რომ აქციას სამცხე–ჯავახეთის ყველა მუნიციპალიტეტიდან უერთდებიან. მათი მიზანია მთავრობას კიდევ ერთხელ შეახსენონ, რომ „მათი დრო დასრულდა“.

„აქციის მიზანია წინასაარჩევნოდ კიდევ ერთხელ ხმამაღლა გავაგონოთ მთავრობას, რომ მათი დრო ამოიწურა და დროა წავიდნენ სახლებში. საქართველოს მასშტაბით იმართება აქცია, რომელსაც ნახევრად ხუმრობით და ნახევრად სერიოზულობით „დაუპიპინე ბიძინას“ დავარქვით“, – ამბობს ზურაბ ჩილინგარაშვილი.

მისი განმარტებით, მანქანებით მსვლელობა კორონავირუსის პრევენციის მიზნით გადაწყვიტეს.

„დაახლოებით ერთი კვირის წინ ჩვენ გვქონდა დაგეგმილი დიდი აქცია, რომელიც უნდა ჩაგვეტარებინა თბილისში, მაგრამ პანდემიამ ხელი შეგვიშალა, ამიტომ გადავწყვიტეთ, რომ გაგვეუქმებინა აქცია. შემდეგ მვიღეთ გადაწყვეტილება, რომ მანქანებით მსვლელობა მოგვეწყო“, – ამბობს ჩილინგარაშვილი.

„დაუპიპინე ბიძინას“ – შემაჯამებელი აქცია თბილისში ბიძინა ივანიშვილის ბიზნეს-ცენტრთან 20:00 საათზე დასრულდება. როგორც ჩილინგარაშვილი ამბობს, ქვეყნის მასშტაბით 2 000 ზე მეტი ავტომობილი შეიკრიბება.



[ნუკა სტეფნაძე]