ახალქალაქში სასწრაფო დახმარების 12 თანამშრომელს კორონავირუსი დაუფიქსირდა

სასწრაფო-სამედიცინო დახმარების თანამშრომელთა ინფიცირების შესახებ საინფორმაციო სააგენტო Jnews.ge წერს. მათი ინფორმაციით, PCR ტესტის შედეგები ცნობილი გუშინ, 18 ოქტომბერს გახდა.

„ინფიცირებულები ამჟამად თვითიზოლაციაში იმყოფებიან, ახალქალაქში კი სასწრაფო დახმარებაში არავინ მუშაობს. სავარაუდოდ, მომსახურებას ნინოწმინდის სასწრაფო სამედიცინო დახმარება უზრუნველყოფს. ჩვენი სასწრაფო სამედიცინო დახმარების 5 ექიმიდან ოთხს ვირუსი დაუფიქსირდა. ისინი დღეში ასობით ადამიანთან ურთიერთობენ, ვერ ვიტყვი, როგორ და ვისგან დაინფიცირდნენ“, - თქვა ერემ ეზოიანმა jnews.ge-სთან.

ეზოიანის განმარტებით, ყველას გრიპის სიმპტომები აქვთ, ერთის მდგომარეობა კი მძიმეა და იგი გადაყვანილია თბილისის კოვიდ ცენტრში.

„მე პირადად ვაკონტროლებ თვითიზოლაციაში მყოფი ადამიანების მდგომარეობას, ყოველ 3 საათში ერთხელ ვაწვდი ინფორმაციას თბილისს, ინფიცირებულების შესახებ. რაიმე გართულების შემთხვევაში, ჩვენ დაუყოვნებლივ მოვახდენთ რეაგირებას”, - აცხადებს ეზოიანი.

აღნიშნულთან დაკავშირებით, „სამხრეთის კარიბჭე“ დაუკავშირდა ახალქალაქის საზოგადოებრივი ჯანდაცვის ცენტრს, ცენტრმა რედაქცია ახალქალაქის მერის მოადგილსთან, არმენ მარანგოზიანათან გადაამისამართა, თავად მარანგოზიანმა კი კომენტარისგან თავი შეიკავა და გვითხრა, რომ ასეთ საკითხებზე საჯაროდ სამცხე-ჯავახეთის სახელმწიფო რწმუნებულის აპარატის უფროსმა, გიორგი მიქელაძემ უნდა ისაუბროს - „ამასთან დაკავშირებით კომენტარს გუბერნიაში გიორგი მიქელაძე გააკეთებს“, - გვითხრა მარანგოზიანმა.

მიქელაძემ 12 მედპერსონალის დაინფიცირების შესახებ ინფორმაცია ვერც უარყო და ვერც დაადასტურა:

„მე ნამდვილად ვერ დაგიდასტურებთ ამას, ზოგადად სასწრაფო სამედიცინო დახმარებებს არეგულირებს, თვითონ ცენტრალიზებულად ჯანდაცვის სამინისტრო, შესაბამისად, თვითონ არეგულირებს სამუშაო გრაფიკსაც, როგორ და რანაირად იფუნქციონირებს. მე ვერც დაგიდასტურებთ, ვერც ვუარყოფ“.

ოფიციალური ინფორმაციით, სამცხე-ჯავახეთში 19 ოქტომბრის 12:00 საათის მონაცემებით სულ 100 პირია ინფიცირებული. ამ მონაცემებში ახალქალაქის სასწრაფო სამედიცინო დაწესებულების თანამშრომლები არ მოიაზრებიან.

[რინა სარუხანიან]