სამცხე–ჯავახეთში კოვიდინფიცირებულთა რაოდენობა 100–მდე გაიზრდა

სამცხე-ჯავახეთის სახელმწიფო რწმუნებულის აპარატის უფროსის, გიორგი მიქელაძის განმარტებით, რეგიონში კრიტიკულად მძიმე პაციენტები არ არიან: „შვიდი ახალი შემთხვევიდან ოთხი ახალციხის მუნიციპალიტეტშია, ერთი ადიგენის, ერთიც ნინოწმინდის და კიდევ ერთი შემთხვევაც ასპინძის მუნიციპალიტეტში. სულ რეგიონში 100 ინფიცირებულია, დღეს არ გვყავს გამოჯანმრთელებულები და გვრჩება ისევ 30 პაციენტი“.

მისივე განმარტებით, რეგიონში სახლის პირობებში სულ 30–მდე პირი მკურნალობს.

„ნაწილის გადაყვანასთან დაკავშირებით შეტყობინებაა გაკეთებული სასწრაფო სამედიცინო დახმარებასთან და ისინი გადაწყვეტენ, რამდენი განაგრძნობს სახლში მკურნალობას და ვის გადაიყვანენ კლინიკებში, ამიტომ ჯერ ზუსტად არ ვიცით რამდენი დარჩება სახლში“, – ამბობს მიქელაძე.

აპარატის უფროსი ამბობს, რომ ამ ეტაპზე წყაროების მოკვლევა გართულებულია, თუმცა რეგიონში ეპიდსიტუაცია კონტროლირებადია.

„წყაროების მოკვლევა ცოტა გართულდა, ძირითადად არის წინა დაფიქსირებული ინფიცირებულის კონტაქტები და აჭრაში მოგზაურობის მქონე პირები არიან. უკონტროლო მდგომარეობა არმგონია იყოს იქიდან გამომდინარე, რომ მასობრივად ხდება კონტაქტების მოკვლევა, მოძიება და თვითზილაციაში გადაყვანა, შესაბამისად საჭიროების შემთხვევაში მათი გატესტვაც. ვფიქრობ, ჯერ მთლიანად რეგიონში კონტროლდება სიტუაცია“, – განმარტა გიორგი მიქელაძემ.

სამცხე–ჯავახეთში მუნიციპალიტეტების მიხედვით covid-19-ით ინფიცირებულთა რაოდენობა ასე ნაწილდება:

ადიგენის მუნიციპალიტეტი – 31 შემთხვევა;
ახალციხის მუნიციპალიტეტი – 28 შემთხვევა;
ნინოწმინდის მუნიციპალიტეტი – 18 შემთხვევა;
ახალქალაქის მუნიციპალიტეტი – 12შემთხვევა;
ასპინძის მუნიციპალიტეტი – 3 შემთხვევა;

ამ დროისათვის, თვითიზოლაციაში იმყოფება 413 ადამიანი:

ახალციხეში - 210;
ახალქალაქი – 88;
ასპინძა – 36;
ადიგენი – 21;
ბორჯომში - 21;
ნინოწმინდა - 14;

კარანტინში იმყოფება 582 ადამიანი:

17 - ახალციხეში;
565 - ბაკურიანში;

[ნუკა სტეფნაძე]