COVID-19–ის ახალი შემთხვევები ახალციხეში, ახალქალაქსა და ნინოწმინდაში დაფიქსირდა

სამცხე-ჯავახეთის სახელმწიფო რწმუნებულის აპარატის უფროსის, გიორგი მიქელაძის განცხადებით, დღეს გამოვლენილი ახალი შემთხვევებიდან ერთის წყარო უცნობია, ხოლო დანარჩენი შვიდი შემთხვევა ძველ ინფიცირებულებთან არის კონტაქტში.

„რვა ახალი შემთხვევიდან ერთი ქალაქ ახალციხეშია, სამი ახალქალაქის მუნიციპალიტეტში, ხოლო ოთხი ნინოწმინდაში. ახალქალაქი და ნინოწმინდა არის ძველ ინფიცირებულთან კონტაქტში მყოფი პირები, რაც შეეხება ახალციხეს, ამ დროისთვის მიმდინარეობს კონტაქტების და წყაროს მოკვლევა და ალბათ დღის ბოლოს გამოვლინდება გარკვეული დეტალები“, – განაცხადა გიორგი მიქელაძემ.

მისივე განმარტებით, რვა ახალი შემთხვევის გარდა, კიდევ ერთი ფიქსირდება. ახლქალაქის მუნიციპალიტეტში მცხოვრებს კორონავირუსი თბილისის ერთ–ერთ კლინიკაში დაუდასტურდა.

„სულ გვაქვს 49 შემთხვევა რეგიონში, თუ დავამატებთ თბილისში დადასტურებულ შემთხვევას, მაშინ გამოვა 50. ამ ეტაპზე ვარკვევთ ბოლოს როდის ჰქონდა ინფიცირებულს ახლქალაქის მუნიციპალიტეტში მცხოვრებლებთან კავშირი“, – განმარტა მიქელაძემ.

ბოლო 24 საათში, რეგიონიდან 171 ნიმუში შემოწმდა ლაბორატორიაში, აქედან რვა დადებითი, ხოლო დანარჩენი უარყოფითია. სამცხე–ჯავახეთში კიდევ 288 ტესტის პასუხს ელოდებიან.

რაც შეეხება, თვითიზოლაციას, რეგიონის მასშტაბით 274 მოქალაქეა:

ნინოწმინდა – 75;
ახალქალაი – 71;
ადიგენი – 69;
ასპინძა – 43;
ბორჯომი – 9;
ახალციხე – 7;

კარანტინში ამ დროისთვის 77 მოქალაქეა. აქედან ოთხი ახალციხეში სასტუმრო „გრანდ პალასში“ იმყოფება, ხოლო დანარჩენი 73 ბაკურიანის სატუმროშია გადანაწილებული.


[sknews.ge]