სამცხეში ‘ჩვენი საქართველოს’ მაჟორიტარობის კანდიდატი ბესარიონ ფოფხაძე იქნება

ბესარიონ ფოფხაძე, ბორჯომის საკრებულოს ყოფილი წევრია, ახლა კენჭს სამცხეში იყრის. ახლადშექმნილ პარტიაში „ჩვენი საქართველო - სოლიდარობის ალიანსი“ იგი სარევიზიო კომისიის თავმჯდომარეა.

„წარდგენა იყო, მაგრამ ჯერ აკრედიტაცია არ მოუციათ ჩემთვის ცესკოდან. არ ვიცი გამატარეს თუ არა. ამიტომ აქტიური საარჩევნო კამპანია არ დამიწყია. არ ვენდობი ცესკოს და ამიტომ მეეჭვება. როცა ოცნებაში ვიყავი, მე შემიცვალეს დოკუმენტები „ოცნების“ შტაბში და ახლა მით უმეტეს არ ვენდობი“, - აცხადებს ფოფხაძე.

იგი 1999 წლიდან პარტია „მრეწველები გადაარჩენს საქართველოს“ წევრი იყო. შემდეგ პარტია „ქართული ოცნების“ კოალიციაში გაერთიანდა და ბესარიონ ფოფხაძეც ბორჯომის საკრებულოში „ქართული ოცნების“ სახელით შევიდა.

„ვთვლი, რომ „ოცნებამ“ გაყიდა ძველი გვარდია, გაყიდა ის იდეები, რომლითაც ის მოვიდა ხელისუფლებაში და ასე ვთქვათ, მოახდინა ნაცმოძრაობიდან პორტირება თავის რიგებში. მიმაჩნია, რომ ჩვენ უნდა ავუხსნათ ყველა ადამიანს, რა საშიშროება იქნება ქვეყნისთვის თუ დარჩა „ქართული ოცნება“. ამისთვის ვიყრი კენჭს მაგ მხარეში, რომ თითოეულ მოქალაქეს შევხვდე და ავუხსნა, რომ ამათი დარჩენა ქვეყნის დამოუკიდებლობას საშიშროების ქვეშ დააყენებს“.

გედევან ფოფხაძე 1972 წლის 13 სექტემბერს, თბილისში დაიბადა. სკოლა ბორჯომში დაამთავრა, რის შემდეგაც თბილისში, სახელმწიფო უნივერსიტეტის ისტორიის ფაკულტეტზე ჩააბარა.

1991 წლის არჩევნებში იყო დამკვირვებელი და კომისიის წევრი.
1998 წელს კენჭი იყარა და გახდა ბორჯომის საკრებულოს წევრი.
1999 წლიდან იყო „მრეწველობა გადაარჩენს საქართველოს“ წევრი.
2017 წლის არჩევნების შემდეგ დატოვა, როგორც „ქართული ოცნების“ რიგები, ასევე ბორჯომის საკრებულოც.

[თაკო ფეიქრიშვილი]