სამცხე–ჯავახეთში ინფიცირებული პაციენტებიდან ერთი გამოჯანმრთელდა

სამცხე-ჯავახეთის სახელმწიფო რწმუნებულის აპარატის უფროსის, გიორგი მიქელაძის განცხადებით, დღეს, 6 ოქტომბერს კორონავირუსით ინფიცირებული ერთი პირი გამოჯანმრთელდა.

„პირველი გამოჯანმრთელება რეგიონში დღეს დაფიქსირდა. პირველი ინფიცირებული ვინც იყო, ის უკვე გამოჯანმრთელებულია“, – განაცხადა გიორგი მიქელაძემ.

მისივე განმარტებით, სამცხე–ჯავახეთიდან არცერთი ინფიცირებული პაციენტი კრიტიკულად მძიმე არ არის.

„ჩვენი ინფორმაციით, ჯერჯერობით არცერთ ჩვენს პაციენტს რთული და კრიტიკული სიტუაცია არ აქვს. ველოდებით კიდევ ორი პირის კლინიკიდან გამოწერას“, – თქვა მიქელაძემ.

შეგახსენებთ, რომ ამ ეტაპზე, სამცხე–ჯავახეთიდან 41 ინფიცირებულია, მათგან ერთი ადიგენის მუნიციპალიტეტში სოფელ ჭეჭლაში სახლის პირობებში გადის მკურნალობას, ხოლო დანარჩენები კოვიდ კლინიკებში არიან გადანაწილებული.

შეგახსენებთ, რომ ადიგენში, სოფელ ჭეჭლაში პირველი ინფიცირება 21 სექტემბერს დაფიქსირდა, ადგილობრივებს, რომლებიც ბათუმში ქორწილში იმყოფებოდნენ კორონავირუსი დაუდასტურდათ.

ამ ეტაპზე ადიგენის მუნიციპალიტეტში თვითიზოლაციაში 76 პირი იმყოფება, ასევე სამი საჯარო სკოლაა დისტანციურ სწავლებაზე გადასული.

[ნუკა სტეფნაძე]