გოდერძი კუბლაშვილმა შიმშილობა დაიწყო [ვიდეო]

გოდერძი კუბლაშვილი აცხადებს, რომ კომისიის წევრებმა უკანონო გადაწყვეტილება ადიგენის მერის პირადი ინტერესების გამო მიიღეს.

„ქვეყანაში უნდა იყოს კანონი. არაკომპეტენტური ადამიანები არ უნდა მუშაობდნენ საჯარო სამსახურებში და არ უნდა ასრულებდნენ ვიღაცეების დავალებებს, ვისიც არ უნდა იყოს. უნდა ემსახურებოდნენ პატიოსნად ქვეყანას და მხარეს. ჩემი მოთხოვნაა, რომ მიწის აღიარების კომისიის წევრებმა, რომლებმაც ადიგენის მერის დავალებით, არ დამისაკუთრეს მიწის ნაკვეთი, დატოვონ თანამდებობა“ – აცხადებს კუბლაშვილი.

მან ადიგენის მიწის აღიარების კომისიის გადაწყვეტილება 2020 წლის 17 იანვარს ახალციხის რაიონულ სასამართლოში გაასაჩივრა და პროცესი მოიგო კიდეც, მოსამართლემ ადიგენის კომისიას კუბლაშვილის განცხადების ხელახალი განხილვა დაავალა. მიუხედავად ამისა, კუბლაშვილმა შიმშილობა მაინც გადაწყვიტა, ამბობს, რომ პროტესტს იქამდე გააგრძელებს, ვიდრე კომისიის წევრებს არ გაათავისუფლებენ.

„ეს კომისია უნდა დაიშალოს და მისი წევრები, რომლებიც ფაქტობრივად მარიონეტები არიან, უნდა გათავისუფლდნენ თანამდებობებიდან. ორ დღეში თუ არ დაკმაყოფილდება ეს მოთხოვნა, ამას დაემატება გუბერნატორის გადადგომა“ – აღნიშნავს კუბლაშვილი.

კუბლაშვილის ბრალდება, რომ მიწის აღიარების კომისიის წევრები მერის დავალებას ასრულებენ, „სამხრეთის კარიბჭესთან“ უარყო ადიგენის მერმა, ზაქარია ენდელაძემ.

„არ მაინტერესებს ეგ პიროვნება. სიცრუეა, საერთოდ არ ვეხები კომისიის წევრების საქმიანობას, ეს მინდა იცოდეთ. გოდერძი კუბლაშვილის მოსაზრებები კი საერთოდ არ მაინტერესებს“,– განაცხადა გასულ კვირას ზაქარია ენდელაძემ.

გოდერძი კუბლაშვილი კი სამხარეო ადმინისტრაციის შენობასთან შიმშილობას იქამდე აპირებს, ვიდრე მისი მთავარი მოთხოვნები არ შესრულდება.



[რობი ზარიძე]