‘კარტოფილობა’ ჯავახეთში [ფოტო]

ჯავახეთში კარტოფილს დიდ ფართობებზე თესავენ, მუშახელიც შესაბამისად ბევრი ჰყავთ, რომ მოსავალი თოვლის მოსვლამდე აიღონ. კარტოფილის აღება, როგორც აქ ეძახიან „კარტოფილობა“ შრომატევადი და ხშირად დაუფასებელი საქმეა.

სოფელ დილისკასთან ვართ და კარტოფილის კრეფაზე დასაქმებულებს ვესაუბრებით. მათი უმრავლესობა სოფელ გორელოვკაში მცხოვრები ეკომიგრანტები არიან. ისინი დღიურ სამუშაოზე ოჯახებით არიან გამოსული. ამბობენ, რომ საქმე რთულია, თუმცა სხვა გზა არ აქვთ, რადგან საკუთარი მიწების სიმცირეს განიცდიან, სხვა სამუშაო კი ჯერ ვერ იპოვეს.

„დილიდან საღამომდე ვმუშაობთ, მთელი „ბრიგადა“. დღეში ორ ჰექტრამდე ვკრეფთ, ანაზღაურებით უკმაყოფილო არ ვართ, მაგრამ კმაყოფილიც ვერ იქნები, საქმე რთულია, სხვა სამუშაო კი არ გვაქვს. საზღვრები სანამ ჩაიკეტებოდა, სეზონური სამუშაო ბევრი იყო, თურქეთში გადავდიოდით. ახლა ყველაფერი ჩაიკეტა, შემოსავალიც სხვა არ გვაქვს, გამოვდივართ ოჯახით და ვმუშაობთ“, – ამბობს დათო ირემაძე, რომელიც 2008 წელს გორელოვკაში მაღალმთიანი აჭარიდან გადმოცხოვრდა.

ამასობაში, დასაქმებულების შესვენებისთვის განკუთვნილი დრო მთავრდება. საუბარს ნაკვეთის მეპატრონესთან ვაგრძელებთ, რომელიც პირველ რიგში გვთხოვს, ფოტოში არ გამოვაჩინოთ.

ამბობს, რომ მოსავალს არ უჩივის, თუმცა ფასი შარშანდელისგან განსხვავებით, დაბალია:

„მიწა არენდით მაქვს აღებული, ბევრი წელია ამ საქმეში ვარ, ხან ასეა, ხან ისე, წელს კარგი მოსავალია, მარა 55 – 60 თეთრზე მეტს არ იხდიან. შარშან 70 თეთრშიც ვყიდიდი ადგილიდან“, – ამბობს სოსო, რომელმაც ფოტოში გამოჩენასთან ერთად, არც გვარის გამხელა ისურვა.

„არ მიყვარს ტელევიზიებში გამოჩენა“ – გვეუბნება სიცილით და კარტოფილის მოყვანის სირთულეებზე გვიყვება.

„შრომატევადი საქმეა, ბევრი მოვლა უნდა კარგი მოსავლის მიღებას. აქედან დაახლოებით სამას მეტრში წყალსაცავია, წყალს იქიდან ვტუმბავთ და ისე ვრწყავთ, მთელი სეზონი ამას დავტრიალებთ თავზე“.

კარტოფილის ამოღების სეზონი ჯავახეთში ოქტომბრის ბოლომდე ყველასთვის დასრულებულია, „კარტოფილობის“ დამთავრება აქ უკვე ზამთრის მოსვლას ნიშნავს.





















[რობიზონ ზარიძე]