ნინო ბურჯანაძის პარტიის პროპორციულ სიაში ბორჯომელი მხარდამჭერი შევიდა

პარტია „ერთიანი საქართველო — დემოკრატიული მოძრაობა“, რომლის ლიდერიც ნინო ბურჯანაძეა, სამცხე-ჯავახეთში მაჟორიტარობის კანდიდატს არ აყენებს, თუმცა ბორჯომელი მაია ხრიკაძე სიის ათეულში იქნება.

ხრიკაძე ამბობს, რომ ბურჯანაძესთან უკვე წლებია თანამშრომლობს: „მე-9 ნომერი არც ჩამოუვარდება მაჟოროტარობას. მეც ისევე ვმუშაობ წინასაარჩევნოდ, როგორც მაჟორიტარები. ვეუბნები, რომ თუ ჩვენი პარტია გავა, მე ვიქნები სამცხე-ჯავახეთიდან მათი წარმომადგენელი“.

მისივე თქმით, მოსახლეობასთან შეხვედრებისას გამოიკვეთა, რომ ყველაზე ხშირად მათ სოციალური პრობლემები აწუხებთ: "ხალხს უამრავი პრობლემა დაუგროვდა, სოციალურ პრობლემაზე აქვთ ყურადღება გამახვილებული. არის სოფლები ბორჯომში, სადაც გაზი არ აქვთ, ასევე წყლის პრობლემებია შიდა სოფლებში, დებეტი არ არის და ზოგ სოფელს წყალი არ აქვს. მაცივარს რომ აღებენ, ცარიელი მაცივარი ხვდებათ, ეს არის მათი თანმხლები პრობლემები, რაც ვერ გადაუწყვიტა მთავრობამ, ასევე სამუშაო ადგილების არ არსებობა“, - აცხადებს ხრიკაძე.

რაც შეეხება ყველაზე მნიშვნელოვან საკითხს, რომელიც კონკრეტულად მის დასახლებაში, ბორჯომში დგას, ეს ტურისტის ნაკლებობაა. მაია ხრიკაძე მიიჩნევს, რომ რუსი ტურიტები ბორჯომისთვის მნიშვნელოვანი შემოსავლის წყაროს წარმოადგენდნენ, ამიტომ საქართველომ რუსეთთან ურთიერთობა უნდა აღადგინოს:

„გავრილოვის ღამის შემდეგ, ბორჯომი ტურისტის ნაკლებობას განიცდის, ეს უკვე მეორე წელია. ჩემი ბავშვობიდან წაღვერ-კეჩხობის ტერიტორია რუსი ტურისტრებით ყოველთვის სავსე იყო. ისინი ტოვებდნენ უამრავ შემოსავალს, ეს არ იყო მარტო კერძო სანატორიუმებისთვის, არამედ მაღაზიებისთვის, რესტორნებისთვის... ამიტომ ვფიქრობ, რომ რუსებთან ურთიერთობა აუცილებელია. ეს ბევრ რამეს დაალაგებს და ამ მხარეს შემოსავალს გაუჩენს. იმასაც დაარეგულირებს, რომ მოლაპარაკება დაიწყება და შეიძლება ეს მავრთულხლართები აღარ იყოს, ასე ვხედავ მეც და ჩემი პარტიის ლიდერიც“, - ამბობს მაია ხრიკაძე.

[თაკო ფეიქრიშვილი]