ახალქალაქში ახლადნამშობიარებ ქალს COVID-19 დაუდასტურდა

კლინიკის მენეჯერის, ალექსანდრე თოროიანის განმარტებით, ქალმა 28 სექტემბერს იმშობიარა, მას მაღალი სიცხე აღენიშნებოდა, ამიტომ 29-ში ტესტი აუღეს, პასუხი კი პირველ ოქტომბერს გაიგეს.

მისივე თქმით, კლინიკის ხუთი თანამშრომელი, ოთხი ექთანი და ერთი ექიმი ინფიცირებულთან კონტაქტის გამო თვითიზოლაციაში გადავიდნენ.

„ორსული ქალი იყო, იმშობიარა, ორი დღე იყო საიზოლაციო სივრცეში. ჩვენ დამზადებული გვაქვს ორსულებისთვის ცალკე საიზოლაციო პალატა და იქ იმყოფებოდა. ერთხელ ჰქონდა მაღალი ტემპერატურა, 39 გრადუსი, ხველა ან სხვა სიმპტომი არ ჰქონია“, - ამბობს თოროიანი.

მისი ინფორმაციით, ახალშობილი თავს კარგად გრძნობდა. ჩვილიც და დედაც თბილისში გადაიყვანეს: „თუ არ ვცდები, პირველ საუნივერსიტეტო კლინიკაში გადაიყვანეს ქალი. რაც შეეხება დაინფიცირების წყაროს, როგორც მისი მეზობლებიდან გავარკვიე, ამ ქალის ოჯახში იყვნენ სტუმრად ნათესავები, რომლებიც მანამდე ბათუმში იმყოფებოდნენ, სხვა ინფორმაცია არ მაქვს“, - თქვა თოროიანმა.

ორი ოქტომბრის მონაცემებით, რეგიონში ინფიცირებულების რაოდენობა 36–მდე გაიზარდა.

[მარიამ ბარძიმაძე]