‘მარნეულში მომხდარი შიშის დათესვის დემონსტრირებაა’ – ენმ–ს აქცია ახალციხეში

„შევიკრიბეთ „ერთიანი ნაციონალური მოძრაობის“ მხარდამჭერები, ვაპროტესტებთ, მარნეულში ჩვენი საოლქო კომისიის წევრზე, ლაშა ქველაძეზე დავდასხმას. ჩვენი დღევანდელი შეკრება ერთგვარი გაფრთხილებაა“, - განაცხადა ენმ-ს ახალგაზრდული ფრთის თავმჯდომარე, დავით ახალკაცმა.

„ნაციონალური მოძრაობის“ წევრის, კობა სანდროშვილის განცხადებით, მარნეულში მომხდარი დაპირისპირება, წინასაარჩევნოდ საზოგადოებაში შიშის დათესვას ემსახურება.

„ის რაც მარნეულში მოხდა, ვერ დავარქმევთ პირად ანგარიშსწორებას. ესაა ცალსახად დემონსტრირება შიშის დათესვის საზოგადოებაში, რაც ვერანაირად ხელს ვერ უწყობს მშვიდობიანი და ნორმალური საარჩენო გარემოს ჩამოყალიბებას. ყველაფერი მიმართულია იქითკენ, რომ მოხდეს საზოგადოების, ამომრჩევლის და კონკრეტულად ოპოზიციური სპექტრის ამომრჩევლის დაშინება, მხოლოდ და მხოლოდ ამას ემსხაურება საოლქო კომისიის წევრზე მომხდარი ფიზიკური ანგარიშსწორება. ჩვენ ვნახეთ ისიც, რომ საოლქო კომისიას ამასთან დაკავშირებით არანაირი რეაგირება ჰქონია“, - განაცხადა ენმ–ს წევრმა კობა სანდროშვილმა.

29 სექტემბერს, ღამით მარნეულში დაპირისპირება მოხდა. “ერთიანი ნაციონალური მოძრაობის” განცხადებით, “ქართული ოცნების” წარმომადგენლები ფიზიკურად გაუსწორდნენ მათ მხარდამჭერ ლაშა ქველაძეს და მის მანქანაში მსხდომ პირებს. პარტიაში ამბობენ, რომ დააზიანეს ქველაძის კუთვნილი ავტომანქანაც.

„ქართული ოცნების“ წარმომადგენლების მტკიცებით, ენმ-ს წევრები მათ მხარდამჭერებს სიტყვიერ შეურაცხყოფას აყენებდნენ, ერთ-ერთი მათგანი, ლაშა ქველაძე კი საუბნო კომისიაში შეიჭრა და „ოცნების“ წარმომადგენელს ფიზიკური შეურაცხყოფა მიაყენა.

მომხდარის გაშუქებისას ასევე ფიზიკური შეურაცხყოფა მიაყენეს “მთავარი არხის” და “პირველი არხის” თანამშრომლებს. დამტვრეულია ორივე ტელეკომპანიის აპარატურა.

შინაგან საქმეთა სამინისტროს ინფორმაციით, მარნეულში მომხდარ ინციდენტებზე გამოძიება ორი მუხლით დაიწყო – ძალადობა (სსკ-ის 126-ე) და ჟურნალისტურ საქმიანობაში ხელის შეშლა (სსკ-ის 154-ე).

[sknews.ge]