‘შსს მიზანმიმართულად ავრცელებს სიცრუეს ჩვენზე’ – 'ტრიბუნას' მხარდამჭერი პოლიციაში დაიბარეს [ვიდეო]

ასპინძის პოლიციის სამმართველოში „ტრიბუნას“ მხარდამჭერი დღეს, 28 სექტემბერს დაიბარეს. პარტიის მაჟორიტარობის კანდიდატი ახალციხე-ადიგენი-ასპინძა-ბორჯომის ოლქში გელა კვარაცხელია ამბობს, რომ მათი პარტიის წარმომადგენელს ვინაობის გამხელა საჯაროდ არ სურს, მით უფრო რომ ამ ეტაპზე მიმდინარეობს საგამოძიებო პროცესი. იგი ფაქტს სავარაუდო ზეწოლას უკავშირებს:

„ვითომ მის [„ტრიბუნას“ მხარდამჭერის] ეზოში თუ მის სახლში აღმოაჩინეს რაღაცა, და ამასთან დაკავშირებით მიდის დაზუსტება. ახლა ექსპერტიზის პასუხს ელოდებიან. მოკვლევა მიმდინარეობს რასთან გავქვს საქმე, რა რაოდენობის იყო და არის თუ არა შეხებაში ჩვენთან. ეს მხარდამჭერი ის იშვიათი გამონაკლისია, ვინც საჯაროდ ბედავს, რომ რომელიმე პოლიტიკური პარიტიის კუთვნილება დააფიქსიროს. ის ჩვენი შტაბის წევრია, იხილებოდა და დღესაც იხილება მისი კანდიდატურა, რომ შეგვეყვანა პარტიის სიაში“, - ამბობს კვარაცხელია.

მისივე თქმით, ეს უკვე მეორე შემთხვევაა რეგიონში, როცა შსს-ს მხრიდან გარკვეული ზეწოლის ფაქტები იკვეთება „ტრიბუნას“ კანდიდატებზე: „დავინტერესდით ამ ამბით, იმიტომ, რომ ამას ძალიან უცნაურად დაემთხვა ჩემი ნასამართლეობის გამოცხადება შსს-ს მხრიდან და ბუნებრივია ჩვენთვის ეჭვს ბადებს, რომ ჩვენს წინააღმდეგ დაიწყო რაღაცა კამპანია“.

კვარაცხელიას თქმითვე, ასპინძის სამმართველოში მას განუცხადეს, რომ გამოძიება კონკრეტული პირის მიმართ იქამდეა დაწყებული, ვიდრე „ტრიბუნასთან“ თანამშრომლობას დაიწყებდა: „დაახლოებით იგი 3 კვირაა ჩართულია ჩვენთან აქტიურად, თუმცა საგამოძიებო მოქმედებები უფრო ადრეა დაწყებულიო, გვითხრეს. პარასკევის შემდეგ, გვაქვს საფუძვლიანი ეჭვი, რომ შსს მიზანმიმართულად ავრცელებს ცრუ და არასწორ ინფორმაციას ჩვენზე. ეს კონკრეტული შემთხვევა შეიძლება არ იყოს ამასთან დაკავშირებული, თუმცა ის, რომ სისტემა თვითონ ამას აკეთებს იმისათვის, რომ ამ რეგიონში არ იყოს ოპოზიციური და განსხვავებული აზრი, ეს უეჭველია და ეს ჩვენთან მიმართებაშიც კი დაადასტურეს“.

საკითხზე „სამხრეთის კარიბჭე“ შსს დაუკავშირდა. რედაქცია უწყებისგან პასუხს ჯერ კიდევ ელოდება.

ცნობისთვის, გელა კვარაცხელიამ დღეს, ახალციხის დემოკრატიული ჩართულობის ცენტში საგანგებო ბრიფინგი მოაწყო, სადაც განაცხადა, რომ ოქტომბრის არჩევნებისთვის მის კანდიდატად დარეგისტრირებას ხელს მიზანმიმართულად უშლიან.



[თაკო ფეიქრიშვილი]