ადიგენში კორონავირუსით ინფიცირებულთა რაოდენობა 11–მდე გაიზარდა

სამცხე–ჯავახეთის მხარის ადმინისტრაციის სამსახურის უფროსის, გიორგი მიქელაძის განცხადებით, დილის მონაცემებით, ადიგენის მუნიციპალიტეტში 11 ინფიცირებულია. ელოდებიან 496 ტესტის პასუხს. ამ ეტაპზე სოფლების ჩაკეტვა არ იგეგმება, გაგრძელდება ტესტირება.

სოფელ უდეში, ახალი დაინიფიცრებული, ექთნის ოჯახის წევრია, მიქელაძის განმარტებით, მას სიმტპომები არ აქვს და ვირუსი სოფელში ჩატარებული მასობრივი ტესტირების დროს აღმოაჩნდა.

რაც შეეხება ჭეჭლას, დღეს კიდევ ერთი პირი დაინფიცირდა. იგი ბათუმში ქორწილში მყოფი პირების ოჯახის წევრი არ არის. ჭეჭლაში კორონავირუსი რვა ადგილობრივს აქვს.

გომაროში covid-19-ით ინფიცირების პირველი შემთხვევაა, ვირუსი 75 წლამდე კაცს დაუდგინდა, მისი ინფიცირების წყარო, უდეს მსგავსად უცნობია.

სამცხე–ჯავახეთში მდებარე მუნიციპალიტეტიდან კორონავირუსი მხოლოდ ადიგენში ფიქსირდება. პირველი შემთხვევა სოფელ ჭეჭლაში 21 სექტემბერს გამოვლინდა, ინფიცირება აჭარაში მოგზაურობას უკავშირდება. ადგილობრივები ბათუმში ქორწილში იმყოფებოდნენ.

ახალციხეში კი იმ პირებს აკვირდებიან, რომლებიც სომეხ ბიზნესმენთან კონტაქტში იმყოფებოდნენ. შეგახსენებთ, რომ პირი, რომელიც ახალციხეში 13–და 14 სექტემბერს იმყოფებოდა, კორონავირუსი დაუდასტურდა. იგი სომხეთში, ერევანში ცხოვრობს და ახალციხეში დედის დაკრძალვის გამო ჩამოვიდა. ამ დრომდე მასთან კონტაქტში მყოფ პირებს კორონავირუსი არ დადასტურებია.

დღეს, დილით თბილისის ინფექციური საავადმყოფოს ბოქსირებული განყოფილების ხელმძღვანელმა, მარინა ენდელაძემ ქვეყანაში ახალი შემთხვევების გაცნობის დროს, სამცხე–ჯავახეთში გამოვლენილი მხოლოდ ერთი ახალი შემთხვევის შესახებ ისაუბრა, გიორგი მიქელაძის განცხადებით, ორ ახალ შემთხვევაზე ენდელაძის ბრიფინგის შემდეგ გახდა ცნობილი.



[sknews.ge]