როგორია მოსახლეობის პოლიტიკური განწყობა ჯავახეთის სოფლებში

"მარტო არჩევნებზე ვახსენდებით" – ამ ფრაზას ბევრ დასახლებაში გაიგონებთ. გამონაკლისი არც ნინოიწმინდის მუნიციპალიტეტის ფარავნის ტბისპირა სოფლები, ფოკა და ვლადიმიროვკაა, სადაც კითხვაზე, ჰყავთ თუ არა ფავორიტი პარტია, პასუხობენ, რომ მათთვის უკვე სულერთია, რომელი პოლიტიკური ძალა იქნება სათავეში.

„მხოლოდ არჩევნების დროს გვიხსენებენ, რომ წავიდეთ და ხმა მივცეთ, მერე ყველას ვავიწყდებით. არჩევნებზე მივალ, მაგრამ არავის მივცემ ხმას, მთავრობები იცვლება ჩვენ ისევ გვაქვს მოუგვარებელი პრობლემები“ – ამბობს ფოკაში მცხოვრები სედა სიმონიანი.

მისი თქმით, აქაურობის ყველაზე დიდი პრობლემა ახალგაზრდების დასაქმებაა, რომელსაც არცერთი პოლიტიკური ძალა ჰპირდება.

„ახალგაზრდები რუსეთში დადიან სამუშაოდ, აქ რატომ არ უნდა იყოს სამუშაო?! ახლა მითუმეტეს, როცა საზღვრები დაკეტილია, უმუშევრად არიან, მიწებიც ცოტაა, საქონელი გვყავს და საძოვრებიც ცოტაა, თუ რომელიმე პარტია ამ პრობლემებს მოაგვარებს, დავუჭერთ მხარს – ამბობს სიმონიანი.

ბეზოიანების ოჯახისთვის კი, რომელიც ასევე ფოკაში ცხოვრობს, მთავარი პრობლემა საძოვრები და თივის ფასია.

„საზღვრები ჩაკეტეს, რუსეთში ერთ თვეში 3 000 ლარს ვიღებდი და აქ კი 3 000-ისთვის 3 წელი უნდა ვიმუშაო, არცაა სამუშაო. ყანებიდან მიღებულ მოსავალს ვერ ვყიდით, მყიდველი მოდის და კაპიკებში უნდა პროდუქტის ყიდვა, მიწები არ გვაქვს სათიბი და საძოვარი ერთ თივაში 10 ლარს ვიხდით ესე როგორ შეიძლება?!“

ბეზოიანები არჩევნებზე წასვლას აპირებენ, თუმცა ჯერ არ იციან პოლიტიკური პარტიების წინასაარჩევნო დაპირებების შესახებ.

„არჩევნებშიც წავალთ და ხმასაც მივცემთ, თუ ამ პრობლემებს მოგვიგვარებენ, – ამბობს - ჰერიქნაზ ბეზოიანი.

სოფელ ფოკაში დაახლოებით 400 ოჯახი ცხოვრობს, აქაურები თავს ძირითადად მესაქონლეობით ირჩენენ.

„მარტო არჩევნებზე ვახსენდებით, ტყუილია ყველაფერი“ – ამ სიტყვებით იწყებს ჩვენთან საუბარს ფარავნის ტბის მიმდებარე კიდევ ერთი სოფლის, ვლადიმეროვკის მკვიდრი სერგეი მანგასაროვი.

სოფელი ფოკიდან ორი კილომეტრის დაშორებით მდებარეობს. აქ არც ბუნებრივი აირია გაყვანილი და არც ასფალტი. მოსახლეობის მთავარი პრობლემაც სწორედ ესაა.

„გზამ და გაზმა ჩვენამდე ვერ მოაღწია. მე ყველა კანდიდატს ვიცნობ, მაგრამ რა. სოფელში მხოლოდ განათება გაგვიკეთეს, ჩვენ ვთხოვეთ, რომ ასფალტი დაგვიგონ და გაზი შემოიყვანონ მაგრამ არ გაგვიკეთეს. ამას ვითხოვთ დიდი ხანია, მაგრამ ტყუილია ყველაფერი, ვინც ჩვენ ნამდვილად რამით დაგვეხმარება ჩვენც ხმას იმას მივცემთ, მაგრამ არ აკეთებს ჯერ არავინ არაფერს“ – ამბობს სერგეი.

საპარლამენტო არჩევნები საქართველოში 31 ოქტომბერს ჩატარდება, 17 სექტემბრის მონაცემებით, ხუთი მაჟორიტარი დეპუტატობის კანდიდატია, აქედან ერთი, ენზელ მკოიანი კენჭს დამოუკიდებელ კანდიდატად იყრის. იგი 21 წელია პარლამენტშია, ოქტომბრის არჩევნებისთვის მმართველმა გუნდმა მის ნაცვლად სამველ მანუკიანი დაასახელა.

[რობი ზარიძე, რიმა სარუხანიან]