‘ოცნების’ კანდიდატების სამეწარმეო საქმიანობა და პოლიტიკური შემოწირულობები

TI-ს კვლევის მიხედვით, ახალციხე–ადიგენი–ასპინძა–ბორჯომის ოლქში მაჟორიტარობის კანდიდატი, ანტონ ობოლაშვილი, ჯამში 8 კომპანიაში ფლობს წილებს, ან იკავებს დირექტორის პოზიციას. ეს კომპანიები თავის მხრივ, კიდევ 6 კომპანიას ფლობენ.

ობოლაშვილის ერთ–ერთ კომპანიას, შპს „გლობალფარმს“, რომლის 100% წილის მფლობელი და დირექტორიც სამცხის კანდიდატია, სახელმწიფო შესყიდვებში მონაწილეობის ისტორიაც აქვს.

„2012-2017 წლებში კომპანიამ მიიღო 18 პირდაპირი კონტრაქტი, აქედან 17 მცირე – 43 472 ₾, ხოლო ერთი (2012) დიდი – 210 119 ₾“ – ვკითხულობთ კვლევაში.

„გამჭვირვალობის“ განცხადებით, სამეწარმეო საქმიანობაში ჩართულია ობოლაშვილის მეუღლეც, რომელიც წილებს 5 კომპანიაში ფლობს, ლია ობოლაშვილის ერთ–ერთმა კომპანიამ შპს „დანი 2012“–მა სახელმწიფო ბიუჯეტიდან პირდაპირი შესყიდვებით 2013-20 წლებში სულ მცირე 600 000 ლარზე ღირებულების კონტრაქტი გააფორმა.

ანტონ ობოლაშვილის კომპანიის შპს „გლობალფარმის“ კომერციულმა დირექტორმა რობერტ ელოიძემ „ნაციონალურ მოძრაობას“ 2012 წელს 50 000ლ შესწირა.

ორგანიზაციის კვლევა მოიცავს 2012–დან 2020 წლის 20 აგვისტომდე პერიოდს, შესაბამისად კვლევაში ვერ მოხვდა ობოლაშვილის ოჯახის წევრების პოლიტიკური შემოწირულობები, კერძოდ, ობოლაშვილის შვილმა, მეუღლემ და ცოლის დამ „ქართულ ოცნებას“ 76 ათასი ლარი შესწირეს.

სამეწარმეო საქმიანობაში აქტიურადაა ჩართული „ოცნების“ ახალქალაქისა და ნინოწმინდის მაჟორიტარი დეპუტატობის კანდიდატი, სამველ მანუკიანი, რომელიც ასევე მმართველი პარტიის დამფინანსებელიცაა. მანუკიანი პარლამენტის მოქმედი დეპუტატია, TI-ს მიხედვით, მიუხედავად კანონის მოთხოვნისა, მას კომპანიების წილები სხვა პირისთვის სამართავად არ გადაუცია.

„იგი პარლამენტის მოქმედი წევრია და მის საკუთრებაში არსებული კომპანიები დეკლარირებული აქვს, თუმცა საჯარო დაწესებულებაში ინტერესთა შეუთავსებლობისა და კორუფციის შესახებ კანონის მოთხოვნის საწინააღმდეგოდ, მას ეს წილები მართვის უფლებით დროებით სხვა პირისთვის არ გადაუცია“ – ნათქვამია კვლევაში.

პარლამენტის მოქმედი დეპუტატი „ქართული ოცნების“ დამფინანსებელთა სიაშიც ხვდება, 2016 წელს მან მმართველ პარტიას 45 000 ლარი შესწირა.
საერთო ჯამში, საერთაშორისო გამჭვირვალობამ „ქართული ოცნების“ მაჟორიტარობის 30 კანდიდატის სამეწარმეო საქმიანობა და პოლიტიკური შემოწირულობები შეისწავლა. ორგანიზაციის განცხადებით, მათგან 19 აქტიურადაა ჩართული სამეწარმეო საქმიანობაში. ისინი დაკავშირებული არიან ჯამში 186 კომპანიასთან.

რაც შეეხება პოლიტიკურ შემოწირულობებს, 30 კანდიდატიდან მმართველი პარტიის შემწირველი 14 იყო, მათ ჯამში „ქართულ ოცნებას“ 740 826 ლარი შესწირეს, ხოლო მათმა ოჯახის წევრებმა და ბიზნესპარტნიორებმა ერთად – 3 702 826 ლარი.

[რობი ზარიძე]