გედევან ფოფხაძე თვითიზოლაციაში იმყოფება

ფოფხაძე ლევან გოგიჩაიშვილს სამი დღის წინ ღია სივრცეში შეხვდა. თავს კარგად გრძნობს, თუმცა უსაფრთხოების მიზნით თვითიზოლაციაში იქნება.

„სამი დღის წინ მქონდა ლევანთან შეხვედრა, რომელსაც ვირუსი დაუდასტურდა. საბურთალოზე ვიყავით ღია ცის ქვეშ. დღეს გავიგე, რომ კოვიდი დაუდასტურდა და გადავდივარ თვითიზოლაციაში სანამ ტესტს არ ჩავიტარებ, ამ ეტაპზე საეჭვო სიმპტომები არ მაქვს. ოჯახის წევრებთანაც არ მქონია შეხება ისინი ბორჯომში არიან“, – ამბობს გედევან ფოფხაძე.

ფოფხაძის განმარტებით, ტესტის პასუხის შემდეგ გადაწყვეტს როდის გააგრძელებს მოსახლეობასთან წინასაარჩევნო შეხვედრებს. იგი „ჩვენი საქართველო - სოლიდარობის ალიანსის“ მაჟორიტარი დეპუტატობის კანდიდატია დიდუბე-ჩუღურეთის ოლქში.

„თუ უარყოფითი პასუხი იქნება გავაგრძელებ ჩვეულებრივ ცხოვრებას. მე ისედაც ვაპირებდი სანამ აქტიურ წინასაარჩევნო კამპანიაზე გადავიდოდი ტესტის ჩატარებას, რადგან არ მინდა ვინმე ჩავაყენო უხერხულ მდგომარეობაში“, – განაცხადა ფოფხაძემ.

პარლამენტის წევრის და პარტია „ჩვენი საქართველო – სოლიდარობის ალიანსის“ დამფუძნებლს ლევან გოგიჩაიშვილს და მის მეუღლეს კორონავირუსი დღეს, ცხრა სექტემბერს დაუდასტურდათ. ამის გამო, გოგიჩაიშვილის თანაგუნდელების ნაწილი თვითიზოლაციაში გადავიდა

[ნუკა სტფენაძე]