‘ვანო მერაბიშვილი წინასაარჩევნო კამპანიაში ჩაებმება’ - ენმ-ს წარმომადგენლები

ვანო მერაბიშვილი სამცხე–ჯავახეთში გუშინ, 16 აგვისტოს იმყოფებოდა. ენმ-ს ახალციხის შტაბში გვითხრეს, რომ მერაბიშვილთან შეხვედრისას სამოქმედო გეგმებზე იყო საუბარი.

რაც შეეხება ასპინძისა და ადიგენის შტაბებს, აქ დაგვიდასტურეს, რომ მერაბიშვილი წინასაარჩევნო კამპანიაში აქტიურად ჩაერთვება.

„შეხვედრა ძირითადად არჩევნების საკითხს შეეხებოდა, ის აქტიურად იქნება ჩართული მაჟორიტარი დეპუტატობის კანდიდატის მხარდასაჭერად“, - განაცხადა ასპინძაში ენმ-ს შტაბის ხელმძღვანელმა გიორგი გიორგაძემ.

ადიგენში ენმ-ს შტაბის ხელმძღვანელის, დავით ოგანეზიანის განმარტებით, მაჟორიტარი დეპუტატობის კანდიდატის დასახელებამდე, კონსულტაციებს გადიან.

სამცხე–ჯავახეთში ვიზიტთან დაკავშირებით, კომენტარს არ აკეთებს ვანო მერაბიშვილი. „საჯაროდ როცა განვაცხადებთ, წინასწარვე დავაანონსებთ და ფბ გვერდებზეც განვათავსებთ ფოტო/ვიდეო მასალას“, – ამბობს მერაბიშვილის წარმომადგენელი ივერი ბალახაშვილი.

ვანო მერაბიშვილი რეგიონში „ევროპული საქართველოს“ წარმომადგენლებსაც შეხვდა, თუმცა მათ გვითხრეს, რომ ეს არ იყო ოფიციალური შეხვედრა. რაზე ესაუბრნენ მას ჩვენთვის უცნობია.

ახალციხე-ადიგენი-ასპინძა-ბორჯომის საარჩევნო ოლქში, ოპოზიციიდან მაჟორიტარობის კანდიდატად ვანო მერაბიშვილი მოიაზრებოდა და ამას თანაპარტიელებიც გვიდასტურებდნენ, თუმცა, მან 3 აგვისტოს განაცხადა რომ კენჭს არ იყრის.

„ნაციონალური მოძრაობა“ ახალციხე-ადიგენი–ასპინძა–ბორჯომის საარჩევნო ოლქში სავარაუდოდ ვაჟა ჩიტაშვილს დაასახელებს. ჩიტაშვილმა „სამხრეთის კარიბჭესთან“ განაცხადა, რომ პარტიაში მისი კანდიდატურა განიხილება.

[მარიამ ბარძიმაძე]