‘მაჟორიტარი დეპუტატობის კანდიდატები სამცხე–ჯავახეთში აუცილებლად გვეყოლება’ – ‘ლელო’

„ჯერ-ჯერობით კონსულტაციები მიმდინარეობს, აუცილებლად გვეყოლებიან სამცხეშიც და ჯავახეთშიც ჩვენი კონდიდატები, ამ დღეებში გაკეთდება ოფიციალური განცხადება“,- გვითხრა ახალციხის რაიონული ორგანიზაციის ხელმძღვანელმა, ჯუმბერ ინასარიძემ.

"ლელომ" 2020 წლის ოქტომბრის საპარლამენტო არჩევნებისთვის, მაჟორიტარი დეპუტატობის კანდიდატები საზოგადოებას 12 აგვისტოს წარუდგინა, მაშინ სამცხე–ჯავახეთის ორ საარჩევნო ოლქში არავინ დაასახელეს და არც განმარტება გააკეთეს.

13 აგვისტოსთვის, რეგიონში მაჟორიტარი დეპუტატობის კანდიდატები, ორ პოლიტიკურ პარტიას ჰყავს დასახელებული, ესენია "ქართული ოცნება" და "ევროპული საქართველო".

"ქართული ოცნების" სახელით სამცხე–ჯავახეთში ანტონ ობოლაშვილი და სამველ მანუკიანი იბრძოლებენ, ობოლაშვილი ახალციხე–ადიგენი–ასპინძა–ბორჯომის მაჟორიტარულ ოლქშია წარდგენილი, მანუკიანი კი ნინოწმინდა-ახალქალაქში.

რაც შეეხება "ევროპულ საქართველოს", მას კანდიდატი მხოლოდ ნინოწმინდა–ახალქალაქში ჰყავს და ეს არსენ კარაპეტიანია.

საპარლამენტო არჩევნები საქართველოში 2020 წლის ოქტომბერში ჩატარდება.

[რიმა სარუხანიან]