‘გამოკითხულთა 82 %-ის აზრით, პანდემიის გამო ეკონომიკური მდგომარეობა ძალიან გაუარესდა’ - IRI

კვლევა 12 აგვისტოს, ინგლისურ ენაზე გამოქვეყნდა.

„კვლევა წარმოაჩენს საქართველოს საზოგადოების მაღალ ნდობას სახელმწიფოს მიერ კორონავირუსის წინააღმდეგ ბრძოლასთან დაკავშირებით. ამასთან მნიშვნელოვანია, რომ საპარლამენტო არჩევნების წინ, პოლიტიკურმა პარტიებმა გამოიყენეს შესაძლებლობა, რათა შეექმნათ პლატფორმები და პროგრამები, რომელიც პასუხობს პანდემიის მიერ გამოწვეულ ეკონომიკურ კრიზისს’ - განაცხადა საერთაშორისო რესპუბლიკური ინსტიტუტის ევრაზიის დირექტორმა სტივენ ნიქსმა.

მოსახლეობის 58%, მათ შორის 21% „ძალიან“, ხოლო 37 % „მეტნაკლებად კმაყოფილია“, იმ სოციალური პროგრამებით, რომლებიც მთავრობამ შეიმუშავა პანდემიის მიერ გამოწვეული პრობლემების შესამსბუქებლად.

მოქალაქეთა აბსოლუტური უმრავლესობა (94%) ეთანხმება, რომ დაავადებათა კონტროლისა და საზოგადოებრივი ჯანმრთელობის ეროვნული ცენტრის, ჯანდაცვის სამინისტროს (91 %) და პრემიერ-მინისტრის ოფისის (81 %) მუშაობა პანდემიასთან ბრძოლაში იყო ეფექტური.

მიუხედავად სახელმწიფოს მხრიდან COVID-19-ის წარმატებული მართვისა, საქართველოს მოსახლეობის 82% თვლის, რომ პანდემიის გავრცელების შემდეგ ეკონომიკური მდგომარეობა მნიშვნელოვნად გაუარესდა.

კვლევა ჩატარდა საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ, 2020 წლის 4 ივნისი - 2 ივლისის პერიოდში.

მონაცემები შეგროვდა შემთხვევითი შერჩევის მეთოდის გამოყენებით, პირისპირ ინტერვიუს გზით. შერჩევა მოიცავდა საარჩევნო ხმის უფლებისა და ასაკის მქონე 1500 რესპონდენტს.

[sknews.ge]