ორი კვირაა არალი-წარბასთუმნის გზაზე გარე განათება გათიშულია

წარბასთუმნამდე მისასვლელ გზაზე გარე განათება 27 ივლისს გაითიშა და ამ დრომდე არ მუშაობს. ადგილობრივები ამბობენ, რომ მიზეზი მათთვის უცნობია: „ორ კვირაზე მეტია ასე ვართ. არ ვიცით რატომ გაითიშა. ამ გზაზე ასფალტი უნდა დაასხან და სამუშაოებია, შეიძლება ამ დროს დაზიანდა რამე. არავინ მოსულა შესამოწმებლად“, - ამბობენ ადგილობრივები.

გარე განათების სისტემის მოვლა-პატრონობაზე პასუხისმგებელი ადიგენის მერიაა. მას „სამხრეთის კარიბჭემ“ პრობლემის შესახებ ორჯერ მიმართა.

30 ივლისს თვითმმართველობაში განაცხადეს, რომ ქსელში მხოლოდ 4 ნათურა იყო გადამწვარი და მალე გამოცვლიდნენ, თუმცა ამ დრომდე პრობლემა კვლავ მოუგვარებელია.

კიდევ ერთი კვირის შემდეგ თვითმმართველობაში აცხადებენ, რომ გარე განათება მხოლოდ ოთხი დღის წინ გაითიშა, მანამდე კი მუშაობდა: „4 დღეა დაზიანებულია, მიღებულია შესაბამისი ზომები და აღდგება უახლოეს მომავალში. ტექნიკური ხარვეზია“, - აცხადებენ მერიაში.

კონკრეტულად რა ხარვეზია ქსელში, თვთმმართველობაში ვერ ასახელებენ.

არალი-წარბასთუმნის გზაზე, გარე განათების სისტემაში სატენდერო დოკუმენტაციის მიხედვით სულ 61 ბოძია. ორ კვირაზე მეტია ყველა მათგანი გათიშულია.

[თაკო ფეიქრიშვილი]