20 ივნისის მოვლენებთან დაკავშირებით თბილისში აქცია გაიმართება

ფოტო: ტაბულა
საპროტესტო აქცია „ერთად ოკუპაციის წინააღმდეგ“ დღეს, 20 ივნისს 19:00 საათზე რუსთაველის გამზირზე გაიმართება. აქციის ორგანიზატორები მოქალაქეებს, რომლებსაც სურთ მისვლა პანდემიის გამო შესაბამისი რეკომენდაციების დაცვას სთხოვენ.

"დაიცავით 2 მეტრიანი სოციალური დისტანცია (ამისთვის დაგახვედრებთ სტიკერებს); მობრძანდით პირბადით, ვეცდებით ჩვენც დავურიგოთ მათ, ვისაც არ ექნება; ყველა სპიკერი გამოსვლის წინ შეგახსენებთ დისტანციის დაცვის მნიშვნელობას; მიკროფონს ჩაუტარდება დეზინფექცია ყველა გამომსვლელის წინ", - ნათქვამია განცხადებაში.

თბილისის მერიის ინფორმაციით, რუსთაველის გამზირზე შეკრება-მანიფესტაციის გამო, დღეს 14:00 საათიდან სატრანსპორტო მოძრაობა დროებით შეიზღუდება. ავტომანქანების მძღოლები პარლამენტის შენობის მიმდებარე ტერიტორიაზე ალტერნატიული ქუჩების გამოყებით შეძლებენ გადაადგილებას.

აქციას, 20 ივნისის დილას, წინ უსწრებდა საქართველოს პარლამენტის სხდომათა დარბაზში, თავმჯდომარის ტრიბუნასთან რუსეთის ფედერაციის დეპუტატ სერგეი გავრილოვის გამოჩენა, რომელიც პარლამენტში მართლმადიდებლობის საერთაშორისო ასამბლეის სხდომის ფარგლებში იმყოფებოდა. რუსი დეპუტატის მიერ მაღალი ტრიბუნის დაკავებამ საზოგადოების დიდი პროტესტი და ანტისაოკუპაციო აქციის გამართვა განაპირობა.

[sknews.ge]