ჯავახეთში, სოფელ ხანდოს მახლობლად დახოცილი ქათმები ყრია

დახოცილი ქათმების შესახებ საინფორმაციო სააგენტო jnews.ge წერს. მათი ინფორმაციით, ადგილობრივები ტერიტორიის მაქსიმალურად სწრაფად დასუფთავებას ითხოვენ, თავად კი მიახლოება ეშინიათ, რადგან შინაური ფრინველის დახოცვის მიზეზი არ იციან. გარდა ამისა, ისინი გაუსაძლისი სუნის გამოც ჩივიან.

სააგენტოს ინფორმაციით, სოფელში ჰყვებიან, რომ ორი დღის წინ დასახლებაში სხვა რეგიონიდან ჩამოსული პირები ცოცხალ ქათმებს ყიდდნენ. მოსახლეობა ამტკიცებს, რომ სწორედ ამ გამყიდველებმა გადაყარეს დახოცილი ქათმები გზაზე.

"ჩვენ თავად შეგვიძლია ტერიტორიის დასუფთავება, თუმცა არ ვიცით რისგან დაიხოცა ქათმები, შეიძლება რაღაც ვირუსი ჰქონდათ, ამიტომ ხელს არ ვკიდებთ, გვინდა, რომ შესაბამისმა დაწესებულებებმა მოაგვარონ ეს საკითხი", - ამბობს სოფელი ხანდოს მცხოვრები რაფიკ აკოპიანი.

სოფელი ხანდოს მცხოვრების სამველ გალოიანის თქმით, მაგ დღეს სოფელში ბევრმა იყიდა ქათამი.

"სოფლის ერთმა მცხოვრებმა 12 ქათამი იყიდა, მათგან სამი მეორე დღეს მოკვდა", - ამბობს სამველ თოროსიანი.

საკითხთან დაკავშირებით "სამხრეთის კარიბჭე" სურსათის ეროვნულ სააგენტოს დაუკავშირდა, სადაც აცხადებენ, ფაქტის შესახებ არც შეტყობინება მისვლიათ და არც რაიმე იციან.

[რიმა სარუხანიანი]