საირმეში ოთხთვიანი ლოდინის შემდეგ გარე განათება ჩართეს

სოფელ საირმეში გარე განათება მას შემდეგ ჩართეს, რაც „სამხრეთის კარიბჭემ“ მასალა მოამზადა. აქ განათების ბოძები დეკემბერში დაიდგა, მოსახლეობა დენის ჩართვას ოთხი თვის განმავლობაში ელოდებოდა.

მაშინ ადიგენის მუნიციპალიტეტში განმარტეს, რომ პრობლემა საგანგებო მდგომარეობამ შექმნა: „კომპანია, რომელიც აკეთებდა ამ ბოძებს, დაასრულა სამუშაოები. შემდეგში, ენერგო-პრო ჯორჯიას ჰქონდა 60 დღის ვადა, რომ ჩაერთო განათება. ამ ვადაში გამოცხადდა საგანგებო მდგომარეობა, შესაბამისად, ვერ მოხერხდა, რომ დასრულებულიყო ჩართვა. რადგან ახლა განახლდა სამუშაოები, დაასრულდება და ჩაირთვება“, - განაცხადეს ადიგენის მერიაში 5 მაისს.

ერთი კვირის შემდეგ დასახლება განათდა: „გუშინ იყვნენ მოსულები საღამოს და ჩართეს. როგორც იქნა გაანათეს“, - ამბობს საირმეში მცხოვრები ჯამბულ აბულაძე.

საირმეში გარე განათების საერთო სიგრძე 1 427 მეტრია, სადაც 37 ბოძი 2019 წლის დეკემბერში დაიდგა. მთლიანი ქსელის მოწყობისთვის ტენედრში გამარჯვებულ კომპანიას, შპს „გუნგლს“ ვადა 2020 წლის 10 იანვრამდე ჰქონდა.

ტენდერი საირმეს გარე განათების ქსელის მოწყობასა და მეზობელი სოფლის ჭელას განათების ქსელის რეაბილიტაციაზე 2019 წლის ნოემბრეში ერთდროულად გამოცხადდა, მათი საერთო ღირებულება 31 471 ლარია. თანხა მთლიანად ადგილობრივი ბიუჯეტიდან დაიხარჯა.

[თაკო ფეიქირშვილი, ადიგენი]